Tivolimi juulli Tasiilarmiunit ileqquliussat nuannersut ilagaat

Ukiut 25-t sinnerlugit Tasiilami atuartut "Tivolimi Juulli" sap. ak. 50-imi sammisaqaatigalugu ingerlattarsimavaat, ukiorlu manna aamma taamaaliorput.

Ukiut tamaasa Tasiilami Alivarpi ”Tivolimi Juulli” ingerlateqqissavaat, atuartullu akuleriaassapput, atuaqatiginngisaminnillu allanik peqateqartussaassapput.

Atuartut sullivinni sorlermiissanerlutik namminneq toqqassavaat soorlu neriniartarfimmi, sukkuaraliorfimmi, kaagiliorfimmi, pannakaaliorfimmi, aliortukkat illuanni allarpassuarnilu. Taavalu ukioq manna aamma atoqqitassanik sannavimmik pilersitsisoqarsimavoq.


Sukkuaqqat nungupallanneqarput

Sapaatip akunnerani sammisaqarnermi imaattarpoq, atuartut ilinniartitsisorlu ataatsimoorlutik sullivinni assigiinngitsuni sapaatip akunnerata aallartinnerani sulisarmata. Sisamanngorneq nal. 16.00 matut ammarneqarput, taavalu ilaatigut angajoqqaat "Tivolimi Juulli" takuniarsinnaalertarpaat.

Suliniutit ilaat nutaajupput, allalli allanngujuitsuusarput. Assersuutigalugu sukkuaqqat piumaneqarluartut siulliuniuffigineqarluartarput. Ukioq manna aammaarluni sukkuaqqanik tuniniaavimmi tunniakkat akunnerup affaata ingerlanerinnaani nungunneqarput.

Neriniartarfik pisarnertut inersimasunit ornigarneqarluarpoq, atuartullu aliortukkat illuat soqutigineruaat, allaat tallimariarlutik misilissinnaallugu. 

Sullivippassuarni isertitat atuarfiup aningaasaateqarfianut ikineqassapput.