Innuttaasunut

Nuup atuarfissaa nutaaq siunissamut piareersimavoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Suut tamarmik pilersaarutit malillugit ingerlassappata, Nuummi atuarfittaassaq 2023-mi atuutilissaaq, tamassumalu tungaanut nunarsuaq unissanngilaq. Ilisimatusaatit nutaat perorsaariaatsinut nutaanut aqqutissiuussisuupput, taamaattumillu pingaaruteqarsimavoq, sanaartornerup periarfissanik patajaatsunik pilersitsinissaa, periutsinik nutaanik atuilernissamut periarfissiisumik.

Meeqqanut Atuarfeqarnermullu Ingerlatsivimmi pisortaq, Helene Berthelsen, oqarpoq: ”Nuannaarpunga suliniut taannarpiaq toqqarneqarmat, patajaatsuummat siunissamilu perorsaariaatsinik atuilernissamut annertuumik periarfissiimmat.

Helene Berthelsen atuarfiullu ningiua Karno Lynge suliap ingerlanerani peqataasimapput, tassanilu ingerlatsivik, atuarfiit aqutsisui, trinini aqutsisut, klassini immikkut atuartitsiffiusuni ilinniartitsisut perorsaasullu Siorarsiorfik – Nuuk City Developement A/S suleqatigalugu atuisunut najoqqutassamik ilusilersueqataatinneqarsimammata.

”Taamaaliornikkut sapinngisamik qulakkeerniarneqarsimavoq, meeqqat, ilinniartitsisut sulisullumi allat pitsaasunik atugassaqartinneqarnissaat”, Helene Berthelsen oqarpoq, isumaqarlunilu, meeqqat siunissami ilinniagaqaqqinnissaannut pitsaanerusunik periarfissaqartitsilernikkut toqqammavissaqarluarnerulernissaat.

Siunissami perorsaanikkut ilinniartitsinikkullu najoqqutassat inissaqartinneqarput

Naliliisartoqatigiit qitiutillugu sammisimavaat, siunissaq ungasinnerusoq eqqarsaatigalugu meeqqanut tamanut qanoq iliorluni atugassanik pitsaanerpaanik pilersitsisoqarsinnaanersoq. Meeqqat nukissallit nukissakinnerusullu atuarnerminni pissarsisussaapput, tamannalu ilaatigut pissutigalugu meeqqat ataasiakkaat qitiutillugit atuartitsinerup aaqqissuunneqarnissaanut pitsaanerpaamik periarfissaqartitsilluni neqerooruteqartoq toqqarneqarpoq.

Aammami anginerusumik atuarfeqarnikkut meeqqanut iluaqutaasussanik pitsaaquteqarneruvoq.

”Atuarfimmi anginerusumi init pilersinneqarnissaat ajornannginnerusarpoq, meeqqat tamarmik ilorrisimaarniassammata. Aammalu perorsaanermi atuartitsinermilu najoqqutassanik ineriartortitsinissamut periarfissagissaarnerulersitsisarpoq, ilinniartitsisut perorsaasullu illorsuami ataatsimiikkunik immikkut isumasiorsinnaasut arlaqarnerussammata” Karno Lynge oqarpoq.