Innuttaasunut

Nuummi atuarfissaq politikkikkut amerlasuunit taperserneqartoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Nuummi atuarfissaq 2023-mi atulersussatut naatsorsuutigineqartoq partiit akimorlugit isumaqatigiissutigineqarluni qulakkeerneqarpoq. Atuarfissuaq nutaaq nutaaliaasoq atuartunut 1.200-nut sunngiffimmilu ornittagaqarnermi meeqqanut 400-nut inissaqassaaq. Tamatuma saniatigut meeqqeriveqassaaq tassanilu meeqqat 120-t missaanniittut paarineqartassallutik.

”Illoqarfimmi atuarfiit marluk qanoq issusaat pitsaasuunngitsut nalunngilarput, taamaattumik ilinniartitsisut illoqarfimmilu meeqqat iluaqutigilluagassaat atuarfik nutaaq sanaartorneqarsinnaanngortoq assut nuannaarutigaarput. Aalajangerneq pingaaruteqarluinnartuuvoq, taamaattumik suliap ingerlanneqarnera tamaat partiit akimorlugit isumaqatigiissutigineqarnera assut nuannaarutigaara.” Borgmesteri Charlotte Ludvigsen (IA) taama oqarpoq.

Ukiut marluk matuma siornatigut Siorarsiorfik – Nuuk City Development A/S-ip (NCD) pilersinneqarnissaa Kommunalbestyrelsimit tamakkiisumik isumaqatigiissutigineqartumik aalajangiunneqarpoq, ingerlatseqatigiiffiullu sulinera kinguneqarluartoq takullugu naammagisimaarinnilluartoqarpoq. AtuarfikH pillugu suliap ingerlanera NCD-mit aqunneqarpoq ilaatigullu Nalilersuisartoqatigiinnit politikkikkut partiinit assigiinngitsunit tunuliaqutaqartumik pilersitsisoqarnikuulluni. Aamma ataatsimiititami politikkikkut partiit assigiinngitsut isumaqatigiinnerat iluatsippoq, tassanilu ÍSTAK-ip 615 mio. koruuninik neqerooruteqarnera suut tamarmik misissorneqareersullu pitsaanerpaatut isumaqatigiissutigineqarluni. Inassuteqaat NCD-mi siulersuisunit akuersissutigineqartoq, tunngaviit aalajangiuteriikkat arlallit tunngavigalugit aalajangiunneqarpoq.

”Neqeroortut marluk assigiingajalluinnarsimapput, taamaattumik ataatsimiititap peqqissaarullugit misissuataarsimavai, qujanartumillu nalilersuisartoqatigiit siulersuisullu tamakkiisumik isumaqatigiinnerannik inerneqarpoq.” Jens B. Frederiksen, NCD-mi pisortaaneq, taama oqarpoq.

CEO Jens B. Frederiksen (NCD), CEO Karl Andreassen (ÍSTAK), Kommunaldirektør Lars Møller-Sørensen, Borgmester Charlotte ludvigsen, & Chief Engineer Hermann Sigurdsson (ÍSTAK).