Innuttaasunut

Qeqertarsuatsiaani isaterineq uummaarissunngortitsivoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Manassinnguak Noahsen nunaqarfimmi aqutsisuni siulittaasuusoq aperigaanni nunaqarfik Qeqertarsuatsiaat uninngasimagaluarpoq. Qujanartumik ukiuni kingullerni tamanna allanngortinneqarsimavoq.

Qeqertarsuatsiaat kivinneqarpoq, taamaalilluni inuuneq, siornatigut uninngaannaraluartoq, uninngaannarunnaarpoq. Tamanna arlalinnik pissuteqarpoq, ilagaat illut 15-inik ikinnerunngitsut aasaq isaterneqarmata.

Isaterineq immaqa ineriartornerup killormoorneraa, kisianni taamaanngilaq. Taamaanngilluinnarpoq.

”Illut qanganitsat isateriaannaallu nunaqarfimmi kusassaataanngilluinnarput. Massakkut torernerulerpoq.” Manassinnguak Noahsen (S) nunaqarfimmi aqutsisut siulittaasuat oqarpoq.

Allaffimmi pisortap Toni Broberg Lyngep siulittaasoq isumaqatigaa.

”Isikkua ilorraallaqaaq, allaanngilaq illut akorni anersaartorfigiuminarnerulersut” oqarpoq.

Illut qimanneqarnikut inissaaleqinerlu

Imminut assortuuttutut ippasikkaluartoq, illoqarpoq inoqanngitsunik inissaaleqisoqarlunilu ataatsikkut. Illut inoqanngitsut najorneqarsinnaajunnaarnikuunerannik peqquteqarpoq, iluarsaannissaalu imminut akilersinnaanngillat.

Taamaattumik utaqqisut allattorsimaffiat suli unamminarpoq, nunami tamarmi ilungersuutigineqartutuut.

Qujanartumik Kommuneqarfik Sermersuumi sumiiffinni tamanut agguataarneqarsimasunik ukiuni kingullerni kommunit inissiaatai nutaat 350-it atulerput.