2020-mut missingersuutit akuersissutigineqarput

Kommunalbestyrelsip ukioq manna kingullermik marlunngornermi novembarip ulluisa 26-ani ataatsimiinnerani Kommuneqarfik Sermersuup 2020-mut missingersuutai akuersissutigineqarput. Kommunalbestyrelse isumaqatigiittoq missingersuutinikakuersissuteqarpoq.


    ”Missingersuutit isumaginninnermut suliassaqarfimmik nukittorsaanissamut, ineriartornissap ikorfartornissaanut kommunillu aningaasaqarneranik nukittorsaanissamut amerlasuut tapersersuineri nuannaarutigaara”, Kommuneqarfik Sermersuumi borgmesteri, Charlotte Ludvigsen, oqarpoq.

    Kommunimit akileraarutit aappaagu allannguuteqassanngillat. Ingerlatsinermut missingersuutit 1,7 milliardit koruuniussapput, sanaartornermut missingersuutit 296 millionit koruuniullutik, missingersuutitigullu 80 millionit koruuninik sinneqartooruteqarnissaq partiinit isumaqatigiissuteqarniartunit kissaatigineqarpoq, siunissami aamma kommunip ineriartortinneqarnissaanut aningaasassaqartoqarsinnaaqqullugu. Partiinit isumaqatigiisuteqartunit kommunimi allaffissornermut aningaasartuutit qaffannginnissaat aamma pingaartinneqarpoq. Taamaattumik akissarsiatigut qaffaasoqarnissaa missingersuutinut ilanngunneqanngilaq.

    Ineriartorneq ikorfartorlugu

    Kommuneqarfik Sermersooq ukiuni makkunani oqaluttuarisaanermi aatsaat taamak nutserfigineqartigaaq. Taamak nutsertoqartiginera missingersuutinut malunniuppoq. Kommunip missingersuutaasa 15 procentiat sanaartornermut immikkoortinneqarput. Aningaasat taakku ilaatigut Nuummi aamma Tasiilami inissialiornermut nutaamillu attaveqaatilersuinissamut atorneqassapput. Aammattaaq sanaartorfissagissaanermut missingersuutit 25 procentinik qaffanneqarput, Nuummi nunaminertat piumaneqarnerat annertooq malinnaaffigiumallugu.

    Meeqqat qitiutillugit

    Meeqqanut tunngasuni suliassarpassuit aamma missingersuutini annertuumik sunniuteqarput. Kommunalbestyrelsip aallaqqaammulli isumaqatigiissutigivaa, meeqqat atugarliortut sullinneqarnerat ajorseriaateqartinneqassanngitsoq, akerlianilli meeqqanut tunngasunut aningaasat amerlineqassapput.

    Assersuutigalugu, ukiuni arfineq pingasuni tulliuttuni 12,5 millionit koruunit suliniummut Tasiilami Suleqatigiippugut immikkoortinneqarput, tassani Tasiilami suliniutit aamma pitsaaliuinermik iliuuseqarnerit aqqutigalugit inuiaqatigiinnik inerisaasoqarlunilu aaqqissuussisoqarpoq.

    Illoqarfiit pitsaanerusut

    Kommuneqarfik Sermersooq ukiuni kingullerni kommunimi innuttaasunut immikkoortunik sukisaarsarfissanik pilersitsinissi sulissutigivaa. Tamanna ilaatigut sissaq sinerlugu aqqutissaliornermik, illoqarfiup qeqqani biilerfiunngitsunik amerlanerusunik, kiisalu Nuummi Nuussuup Mannguani nutaamik sammisassaqartitsivimmik pilersitsinermik kinguneqarpoq.

    Immikkoortut sukisaarsarfiusinnaasut annertusarneqarnissaannut ukiuni tulliuttuni tallimani ukiumut 5 millionit koruunit immikkoortinneqarput.  Aamma umiatsiaqqaarani tikinneqarsinnaasunik Nuup qanittuani illuaraliortoqassaaq. Illuaqqat atuarfinnit, paaqqinnittarfinnit utoqqarnillu atorneqarsinnaasunngorlugit sullivinnik nakkutilliisoqarfiup piumasaqaatai naapertorlugit sanaartorneqassapput.

    Kalaallit Nunaata Kangia nunaqarfiilu

    Partiit isumaqatigiissuteqartut/Kommunalbestyrelse ukiuni tulliuttuni tallimani 25 millionit koruunit Kalaallit Nunaata Kangiani internetsip pitsanngorsarneqarnissaanut aamma 70 millionit koruunit kommunip nunaqarfinnut immikkoortunut pilersaarutip naammassineqarnissaanut atugassat immikkoortippaat.

    Kommuneqarfik Sermersuup 2020-imi missingersuutai: