Atorfinitsitsinissamut Ataatsimiititamut ilaasortat Bruno Heilmannimut taartissamik naluttarfimmi pisortartaartoqarnissaanik tamarmik isumaqatigiipput.
Decembarip aallaqqattaaniit 30-nik ukiulik Daniel Kâjangmat Lyberth, Naluttarfik MALIMMI pisortanngussaaq.
Ataatsimiititamiillu toqqarneqartoq, angutaavoq piginnaasaqangaartoq. Danielip misilittagaasa nalitoqisut ilagaat Nuummi Peqqinnermut Susassaqartitsinermullu Immikkoortortaqarfimmi susassaqartitsinermut siunnersortaasimanera. Taakkua saniatigut politiitut Innovative Sport Managementimilu ilinniarsimavoq.
Aqutsisoq tusarnaartoq
Daniel siornatigut Tasiilami aqutsisutut sulisimavoq aqutsisutullu aalajangersimasumik eqqarsartaaseqarpoq.
”Sulisumma tusaanissaat pingaarteqaara, sulisummi tusaaneqartutut misigigaangamik suliffimminik nuannaarutiginninnerat annertunerulertartoq upperaara. Suleqatigiillu naammagisimaartut sulilluarnerusarput” Daniel oqarpoq.
Ataatsikkullu atuisut pitsaaqutinik aaqqitassanillu siunnersuuteqartarnerisa tusaaniarneqarnissaat assinganik pingaaruteqarnera naqissuserlugu.
Misilittakkat atorsinnaasut
Politiitut sulineq naluttarfimmi sulinermut sanilliullugu allaannerugaluaqisoq, politiiusimanermini misilittakkani pissarsiaqaatigisimallugit sulilu atorluarsinnaalluarlugit Daniel isumaqarpoq.
”Politiiniinninni ilikkagaqaqaanga ingammik inunnik sullissinissaq ilikkagaqarfigeqaara. Suleqatinik innuttaasunillumi suleqateqarneq” oqarpoq.
Siunissami Innovative Sport Managementimi pikkorissarsimanermini isumassarsiussamaarpoq ilaatigut aaqqissuussat amerlanerulernissaanut aamma nutaanik aaqqissuussisalernissamut. Taamaattumik Naluttarfik MALIK malinnaaviginiariuk.