Paamiuni timersortartoq sulerusussuseqarluartoq isumassarsialillu timersortarfimmi pisortanngorpoq

Kim J. Jensen Paamiuni novembarip aallaqqaataani timersortarfimmi pisortanngorpoq, suliniutillu siulliit aallartinneqareerput.

Paamiuni timersortarfimmi pisortaq nutaaq tassaavoq Kim J. Jensen, taannalu nammineq timersortartuuvoq, suliffittaaminilu ulloq siulleq sulilerpoq isumassarsiassarpassuaqarluni tunniusimallunilu.

”Facebookimi quppernermik pilersitsivugut Paamiut Timersortarfiat, tassanilu ataavartumik paasissutissat ikkuttassavagut” Kim oqarpoq.

Suliassani siulliuvoq fitnessertarfik, taannalu nutarterneqassaaq, piffissaq ungasinnerusoq eqqarsaatigalugu innuttaasut timersortarfimmik tassanilu periarfissarpassuarnut allanut atuisarnerat annertusarneqassaaq.

Kiagunnerinnaq pineqanngilaq

Maannakkut Kim isikkamik arsaannermik nukkassarnermillu aallutaqarneruvoq, mikisunnguullunili timersuutit tamaasa Paamiuni ingerlanneqarsinnaasut misileraaffigisarsimavai.

Tamatuma saniatigut annertuumik timersornikkut aaqqissuussisarnerit ingerlanneqartartut pilersaarusiorneqartarnerat misilittagaqarfigilluarpai. Tassa isikkamik assammillu arsarnermut tunngasuni siulittaasunut ilaasortaasarsimavoq.

Kim Frh. Betoncentral A/S-imi allaffissornermi aqutsisuusimavoq, taamaattumik timersortarfiup ulluinnarni aqunneqarnissaanut tunuliaqutigissaarpoq.

Isumannaatsumik ingerlatsinerup saniatigut Kimip Paamiuni timersortarneq pitsaasumik ineriartortissagaa naatsorsuutigineqarpoq.