Uju Petersen, Kommuneqarfik Sermersuumi Meeqqanut, Ilaqutariinnut Ataatsimiititami siulittaasoq, Naalakkersuisut meeqqat sumiginnagaasarnerat annikillisarniarlugu iliuusissanik pilersaarutaat allannguuteqarnissaa ilimaginngilluinnarpaa.
Uju Petersen, Kommuneqarfik Sermersuumi Meeqqanut, Ilaqutariinnut Ataatsimiititami siulittaasoq isumaqarpoq Naalakkersuisut iliuusissanik pilersaarutaat amigartoq tusarniaassutigigaat. Iliuusissanik pilersaarummi meeqqat sumiginnagaasarnerat annikillisinneqarnissaat anguniagaavoq, ataatsimiititamili siulittaasup meeqqanut ajornartorsiuteqartunut allannguuteqassangatinngilaa.
Isornartorsiutigineqartut ilagaat Naalakkersuisut peqqissutsimut tunngasut ilaqutariinnut sullissiviup suliassaanut ilanngunneqarnissaannut siunniussaat.
”Ajorluinnarpoq. Illuatungaatigut kommunit namminneq aalajangiisinnaatitaanerannik unioqqutitsineruvoq, minnerunngitsumillu ilaqutariinnut sullissiviit meeqqanut ilaqutariinnullu ajornartorsiuteqartunut neqeroorutaapput, kikkunnut tamanut neqeroorutaanatik”. Uju Petersen oqarpoq.
Ajornartorsiuteqartut qitiutinneqarnissaat amigaataavoq
Tamatuma saniatigut Uju Petersenip maluginiarpaa, suliat meeqqanut tunngasut suliarineqartarnerinut tunngasut kiisalu meeqqanut ilaqutariinnullu katsorsaanissamut neqeroorutit pilersaarummi ilaatinneqarpiannginneri.
”Neqeroorut MANU tamanut neqeroorutaavoq, taamaattumik ilaqutariit nukissallit pingaarnertut atuisuunissaat naatsorsuutigineqarsinnaavoq. Ilaqutariinnut ajornartorsiortunut neqeroorutit naleqqussakkat amigaataapput”, Uju Petersen oqarpoq-
Pilersaarummut isornartorsiutaasoq alla tassaavoq isumaginninnermut siunnersortit peqataatinneqanngimmata. Maannakkut ukiumut tallimat arfineq-pingasullu akornanni isumaginninnermut siunnersortitut naammassisoqartarpoq, qaammallu kingulliinnaq eqqarsaatigalugu isumaginninnermut siunnersortitut pissarsiortut 15-20-upput. Taamaattumik, ataatsimiititami siulittaasoq naapertorlugu, nutaanik siunnersuinermi ikiortinngorniartunik kiisalu najugaq qimannagu isumaginninnermik siunnersortitut ilinniarfimmik aallartitsisoqartariaqarpoq.
Avataanut inissinneqarneq
Naggasiullugu siulittaasup kommunit sulinermut akuutinneqarsimasut oqaatigineqarmat naammaginngilaa. ”Suliap ingerlanneqarnerani ataasiaannarluni workshoppertitsisoqarpoq ullorlu ataaseq isumasioqatigiissitsisoqarluni, taakkunanilu immikkoortut pingaarnerit eqqartorneqanngillat”, oqarpoq.