Kommunip umiatsiaatillit nittartagaq Facebookilu aqqutigalugit ujartortalerniarpai

Kommuneqarfik Sermersuumi puttasut 20 fods ataallugit angissusilinnik umiatsiaatilinut atugassiaapput. Malittarisassat malinneqanngippata, piginnittut siunissami nittartagaq Facebookilu aqqutigalugit ujartorneqartalissapput.

Ingerlatsinermut Avatangiisinullu immikkoortortap Kommuneqarfik Sermersuumi umiatsiaatillit, piginnittut umiatsiaatiminnik kommunimi puttasuniititsinissamut piumasaqaatinik naammassinnissimatinnagit siunissami nittartakkami ´Nalunaarutit´ aqqutigalugit ujartorneqartalissapput. Tamassuma saniatigut Kommuneqarfik Sermersuup Facebook-ikkut qupperneratigut nalunaaruteqartoqartalissaaq. Umiatsiat tamarmik atermik mobilillu normuanik nalunaaqutserneqartassapput.

Umiatsiaq 20 fod sinnerlugu angissusilik puttasuni pitussimatinneqartillugu, nalunaarut Facebookimilu ujartuineq aqqutigalugit ullunik pingasunik periarfissaliilluni peeqquneqartassaaq. Taamatut pisoqanngippat, umiatsiaq kommunimit peerneqassaaq, piginnittumut akiligassiissutissanngorlugu.