Innuttaasunut

Timersortartut nersorneriarneqartut

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Pisarneq malillugu Kunngit Pingasut Ulluanni, 6. Januar, Nuummi timersortartut Katuami nersorniarneqarput kikkullu nersorniarneqarsimanersut uani takusinnaavat 

:

Toqqarneqartorlu tassaavoq Najaaja A. Lyberth (GSS Håndbold / GSS Fodbold)

Amerlasuut nalugunanngilaat timersullammammut toqqagaasoq pitsaanerpaamik sukataarluni angusaqarusuttuusoq. Pissartanngorniunnerni sukataartuarpoq pitsaasunillu takutitsiuartarluni. Ukioq naallugu sungiusartarpoq ilaminut holdeqatiminut, allaniillu maligassiuisuulluni.

Sapaatip akunneranut arlaleriarluni sungiusartarpoq, taamatullu peqqissuunissani pingaartillugu. Timersornerminut saniatigut sunngiffimmini peqatigiiffimmi sunniuteqarluartarpoq.

Timersorlammanngortup ukioq 2018-mi angusai kusanarluinnarput. Tassami isikkamik arsaannermi takutitsilluarnermigut Ukiumut holdinut ilannguppoq, pissartanngoqataallunilu. Taamatullu assammik arsaannermi aamma pissartanngorluni, aamma ukiup holdianut ilanngulluni aammalu ukiumilu arsarluarnerpaatut toqqagaalluni. 

Ukiumi piukkunnaatilik Kristian Evaldsen (Qajaq Nuuk)

Toqqagaasoq timersuutinik assigiinngitsunik pissartanngorsimavoq. Unammissutit assigiinngitsuni qajartornermi pissartanngorfigai, inuusuttuaqqani isikkamik arsaannermi pissartanngoqataasimalluni, aammalu assammik arsarnermi pissartanngoqataalluni. Toqqagaasoq GUX timersorneq pillugu ilinniarnertuunngorniarpoq. Qajamik kinngusaarnermi tupaallatsitsisimavoq rekordiliisimavoq inersimasuniit pointeqarnerusimalluni. Nammineq qaanniorneq aamma aallutaraa.

Toqqarneqartullu tassaapput Ari Josefsen,  Ujarneq Tobiassen, Kristian Evaldsen (Qajaq Nuuk)

Iligiillammammut toqqagaasut inuusuttuupput. Taakku imaannaanngitsumik piginnaasaqarput, tassami qaannamik unammersuartarnerni oqaluttuarisaanermi aatsaat taamak angitigisumik Pointinnattoqarluni pissartanngortoqarami 284 Point pissarsiaralugu Rekordiliigamik. Kinngusaqattaarnermilu ikioqatigiillutik ataatsikkut pingasuullutik kinngoriarlutik makeqatigiittartussaagamik tamannalu pitsaasumik takutillugu pissartanngorput.

Ukiorpaalunngortuni inersimasuni rekordiliissutigineqartoq 269 point anguneqarsimanngilaq,

Ukulu inuusuttuaqqat inersimasuniilluunniit pikkorinnerullutik inersimasunilu peqataasimasuugunik pissartanngorsimassagaluramik,

Inuusuttaqqat pineqartut namminneq qaannatik atukkatik sananikuuaat namminneq qaanniornikuupput qajaqanngikkunillu timersuutertik ingerlassinnaanngilaat.

Kajumissaaserneqartut tassaapput NÛK Oldgirls (isikkamik arsartartut)

Kajumissaammik nersorniarneqartut timip aalatinnissaanut pingaarnerutillugu anguniagaqartut. Tassami nalunngilarput timeq aalatikkaanni peqqinnerusumik inooriaaseqalerneq anguneqartarmat. Ilaasortai amerliartorsimapput, immaqa aallaqqaammut amerlanngikkaluarlutik kisianni piumassutsimik ingerlanneqarneranik anguniagaq anguneqarsimavoq tassami ilaasortat amerlimmata. Illoqarfinni allani aamma sunniuteqarniarlutik sulissuteqarsimapput, taannalu timersuut immaqa ukioqqortusinermi ilaaffigineqarnissaa angusaq imaannaanngissinnaagaluartoq, upperalugu sulissutigalu aallussillutik aamma illoqarfiit allat timersuummik taassuminnga aallartinnikuupput.

Unammerusarnissaq ukioq manna aaqqissuunneqarnissaa siullermeertumik anguneqarpoq tamannalu assut nersugassaavoq, suliarmi imaannaanngitsuusarmat.

Toqqagaasorlu tassaavoq David Janussen (b-67 fodbold)

Timersoqatigiinni sungiusaasuuvoq, assullu sungiusartakkaminut sunniuteqartarluni. Sungiusaaffimmini aallussilluarluni peqqissumillu inuuneqarnissaq pingaartitaraa. Tamannalu sungiusakkaminut ajunngitsumik pitsaalluinnartumik angusaqartitsisarpoq.

Ikiuukkumatuujuvoq sungiusakkamilu angusarissaarnissaat anguniarlugu saniatigut piffissanik ujartuisarsimavoq. Allanik sungiusaasuniik nuannarineqarluarpoq suleqatikkuminarlunilu.

Arlaleriaq pissartanngortitsisimavoq nunanut allanut unammisartut aamma guldinnatsissimammagit. Qeqertarsuarmi silami arsaannermi U-17 aamma U-19 pissartanngortissimavai.

Aqutsillammattut toqqagaasoq tassaavoq Kristian Kilime (Fight club nanoq)

Aqutsilluartuuvoq, tunniusimavoq suleqatigiuminarlunilu. Peqatigiiffik naliginnaasuniik allaanerulaartoq ingerlanissaa assut pingaartissimavaa, aqutsilluarnermigullu peqatigiiffik angusaqartittarpaa. Sungiusarnerinnaanngilaq kisiannili inuit peqatigiiffimmi ilaasortat peqatigalugit allanik aamma sammisaqartarput, taamaasilluni peqatigiiffimmi ilaasortat imminnut ataqatigiinnerat ataqqeqatigiinnerallu angusarlugit.

Inuusuttut susassaqartilluarpai, aammalu sungiusaanermini nuannersumik timersuut inuusuttunut sunniuteqartittarpaa. Immaqa peqatigiiffik ilaanni ingerlalluarnerpaanngikkaluaq kisianni aalajaalluni angusaqarusulluni aqutsinermigut ingerlanera suli ullumikkumut aallunneqarluartarpoq.