- Sapaatip akunnerata naanerini tamatigungajaq tamanna nalaattarparput, taamatullu pisoqaraangat sivikinnerpaamik ulloq ataaseq matusisariaqartarneq akulikippoq, taama oqarpoq naluttarfik Malimmi aqutsisoq, Bruno Heilmann

Naluttarfittaani anartoqarsimatillugu meriartoqarsimatillugulu Naluttarfik Malik piffissap ilaatigut matuneqartariaqartarpoq.

- Taamatullu pisoqaraangat annertoorujussuarmik suliakkersuutaasarpoq. Naluttarfimmillu saliinerup nalaani nalukkiaraluartut naluttarfimmik atuisinnaannginnerat assut uggornartuuvoq. Taamatut ajutoorneq pigaangat teknikerip naluttarfik annertuumik klorimik akusarpaa, kingornalu imeq salillugu. Sukumiisumik saliineq ulloq unnuarlu ataaseq tikillugu sivisussuseqartarpoq.

Pingaartumik meeqqanut minnernut naluttarfimmi meeraaqqat meeqqallu minnerit naluffigisartagaanni taamatut pisoqartarnera akulikippoq.

- Nangit nalunnguarnermi ataasiaannarlugit atugassiat angissutsit assigiinngitsut kioskitsinni pisiassaatigaavut, ataaseq 10 koruuneqarpoq. Nangermik ataatsimik allamik pisariaqartitsisoqarpat, taanna akeqassanngilaq.

- Pingaartumik meeqqat mikisut imermik iisisoorsinnaasarput, taamaattumik meeqqatik nakkutigeqqullugit angajoqqaanut kaammattuutigaarput. Meeqqammi naluttarfimmut meriartoorsinnaasarput, tamannalu nalukkiartut sinnerinut uggornarsinnaavoq, Bruno Heilmann oqarpoq.