Najukkami Ataatsimiititamut septembarip ulluisa 17-ianni qinersisoqassaaq. Qinigassanngortinniaruit qinigassanngortittut allattorsimaffiannut kingusinnerpaamik septembarip ulluisa 14-ianni nalunaarsimassaatit.

Nuummi najukkami ataatsimiititaliamut qinigassanngortittut

Qinigassanngortittunut tunngasut paasisaqarfigikkit

Nuummi najukkami qinersineq ima ingerlanneqassaaq

Nuup ineriartorneranut sunniuteqaqataarusuppit? 16-inik ukioqalereersimavit? Nuummi najugaqartutut nalunaarsimavit?

Apeqqutit taakku pingasut tamaasa angersinnaagukkit, taava illoqarfiit pingaarnersaata siunissamut ilusilersorneqarneranut periarfissatsialak aana.

Nuuk Najukkami Ataatsimiititaliaqassaaq. Najukkami Ataatsimiititaliami ilaasortatut pilersaarusiat suliassallu aallartitseqataaffigissavatit Nuummilu ineriartorneq, ataatsimoorneq inuunerullu pitsaassusianik nukittorsaaqataallutit. Assersuutigalugu suliniutit illoqarfiit pingaarnersaani illoqarfiup tunngaviinut avatangiisianullu pitsaanerulersitsisut, aamma suliniutaasinnaapput peqqinnermut, angallannermut, timersornermut, atuarfeqarnermut, meeqqanut, utoqqarnut, kulturimut sunngiffeqarnermullu tunngasut.

Najukkami Ataatsimiititaq aqqutigalugu Nuummiut aamma kommunimi politikerit oqartussallu akornanni ammasumik oqaloqatigiinnermut tunngavilersueqataassaatit. Taamaattumik Kommuneqarfik Sermersuumi kommunalbestyrelse siunissami najukkami ataatsimiititamut saaffiginnittassaaq Nuup illoqarfiata ilaanut apeqqutinut aalajangiinernullu pingaarutilinnut atatillugu.

Qinersineq, paasissutissiilluni ataatsimiinneq kiisalu nalunaarneq
Najukkami ataatsimiititamut qinersineq innuttaasunik ataatsimiititsinermi ataasinngornermi septembarip ulluisa 17-iani nalunaaqutaq 19-21 Katuami pissaaq.Sapaatip akunnera sioqqullugu septembarip ulluisa qulingani najukkami ataatsimiititap suliai paasissutissiilluni ataatsimiinnermi paasisaqarfigisinnaavatit Nuummi kommuneqarfiup allaffeqarfiani Innuttaasunik sullissivimmi paasissutissiilluni ataatsimiititsinermi nalunaaqutaq 19-20.30.

Najukkami ataatsimiititamut qinigassanngortikkusullutit kissaatigigukku taava kingusinnerpaamik septembarip ulluisa 14-iani nalunaassaatit. Taamatut iliorsinnaavutit immersugassaq “qinigassanngortinnermut nalunaarfik” immersorlugu. 16-inik ukioqaruit 18-inillu suli ukioqalersimanak, aamma angajoqqaanniit/ilinnut akisussaasumiit akuersilluni atsiorneq pissarsiareqqaassavat.

Qinigassanngornermut nalunaarneq
Akuersissuteqarnermut atsiorneq

Qinigaaffik ukiunut pingasunut atuuppoq, ilaasortatullu qaammammut ajunngitsorsiassaqartinneqassaatit. Najukkami ataatsimiititaliaq qaammammut ataasiarluni marloriarluniluunniit ataatsimiittarpoq.

Kommuneqarfik Sermersooq 2015-imili Tasiilami, Paamiuni aamma Ittoqqortoormiini najukkami ataatsimiititaliaqarpoq. Nuummi najukkami ataatsimiititaliaq oktobarimi sulilissaaq.

Nuummi najukkami qinersineq ima ingerlanneqassaaq

Sukumiinerusunik paasissutissanik pissarsiniarfigineqarsinnaasoq:
Najukkami ataatsimiititalianik ataqatigiissaarisartoq Jill S. Hellesen
E-mail: jish@sermersooq.gl
Oqarasuaat: 36 70 25