Borgmesterit: Kommunit aqutsisinnaanerat Naalakkersuisunit sanngiillisarneqarpoq

Aningaasaqarnermut Naalakkersuisup inatsisissatut siunnersuutaa Nunatsinni kommunit tallimaasut borgmesteriinit assut aarlerineqarpoq. Marlunngornermi septembarip ulluisa 25-anni Naalakkersuinikkut Ataqatigiissaarisartoqatigiinni Naalakkersuisunut tamanna oqariartuutigaarput.

Siunnersuut naapertorlugu aktieselskabit kommuninit pigineqartuni taarsigassarsiassat, attartornermut isumaqatigiissutit isumannaallisaanermullu tunngasut tamaasa Naalakkersuisunit akuersissutigineqaqqaartassapput, ima paasillugu, ingerlatseqatigiiffiit siunissami namminneq aalajangiisarunnaassapput.

Siunnersuut kommunit namminersorlutik aqutsinerannut sakkortuumik akuliunnertut isigaarput. Kommunit aalajangiisinnaanerannik killilersuineruvoq taamaalillutillu kommunit allaffissornikkut nakkutigisaasutut inissinneqarlutik.  Tamanna akuersaarnartuutinngilluinnarparput.

Aktieselskabiutitta ingerlanneqarnera siulersuisunut qinikkatsinnut kommunimi qinikkatut suliakkiutigaavut. Siulersuisut taamaalillutik politikkikkut akuleruffigineqaratik ingerlatseqatigiiffiit kiffaanngissuseqarlutik ingerlassinnaasariaqaraluarpaat. Naalakkersuisut nalinginnaasumik iliortarnerat eqqarsaatigalugu, suliffeqarfiutitta politikkikkut akuleruffigineqaratik ingerlasinnaanerat iluarisimaarparput.

Inatsisissatut siunnersuummi oqaatsit atorneqartut naapertorlugit, toqqorsiviup attartornissaanut isumaqatigiissusiorniaraanni imaluunniit qarasaasiamik attartorniarluni isumaqatigiissusiorniaraanni, Naalakkersuisunit akuerineqaqqaassapput, susassaqarfinnilu allanit misilittakkavut naapertorlugit tamakku qaammatit arfinilinniit ukiup ilivitsup tungaanut sivisussuseqarsinnaapput.

Taamatut atugaqartitaanermi kommuninit assersuutigalugu bussiuteqarneq imaluunniit inissiaatileqatigiiffeqarneq ingerlanneqarsinnaajunnaassapput.

Inatsisissatut siunnersuut isumaqatigiissutaasut atuuttut unioqqutillugit juulip qaammataani tusarniaassutitut nassiunneqarpoq, taamatullu iliortoqarneratigut imarisaata soorlulusooq Naalakkersuisut paaseqqunngikkaat.

Inussiarnersumik
Asii Chemnitz Narup, borgmesteri, Kommuneqarfik Sermersooq
Malik Berthelsen, borgmesteri, Qeqqata Kommunia
Kista P. Isaksen, borgmesteri, Kommune Kujalleq
Ane Hansen, borgmesteri, Kommune Qeqertalik
Ane Lone Bagger, borgmesterip tullia siulleq, Avannaata Kommunia