Pinnguarnermik ingerlatitsisut nunaqarfinnut sisamanut angalasut

Tasiilami Alivarpimmi pinnguarnermik ingerlatitsisut Isertoq, Tiilerilaaq, Sermiligaaq Kuummiullu tikeraarpaat. Pinnguarnermik ingerlatitsisut najoqqutassiaasa siammarterneqarnissaa siunertarineqarpoq – atuarfinni anitsiarnermi aaqqissuussaasumik pinnguarneq.

Pinnguarnermik ingerlatitsisut – atuarfimmi angajullerni atuartuusut – ukioq manna siusinnerusukkut Tunumi atuarfinnut tikeraarput atuartut ilinniartitsisullu pinnguarnermik ingerlatitsinissaannut ikioriartorlugit.

”Pinnguarnermik ingerlatitsinerup nuannersortaanik avitseqateqarusuppugut, taamaaliornitsigut nunaqarfinni atuartut aamma taamatut nuannaaruteqarniassammata,” atuartoq Maja Olsvig Kristiansen oqarpoq, pinnguarnermik ingerlatitsisut aallartimmatali ilaasoq.

Aggustimi Tasiilami Alivarpimmi 9. klassimi atuartut aqutsisoqatigiit aamma elevhjemmimi aqutsisup nunaqarfinnut angalammata ilaapput. Isertumi, Sermiligaami, Tiilerilaami Kuummiinilu atuartut Tasiilameersut pinnguarnermik ingerlatitsisut peqatigalugit pikkorissarnermi peqataapput.

”Atuartut Pinnguarnermik ingerlatitsisut assut tigulluarsimavaat, Sermiligaamilu pinnguarnermik ingerlatitsisut assut ingerlallualereersimapput,” taama oqarpoq atuarfiup aqutsisua Kennet Stenbakken.

Iluarisimaarinninneq anginerulerpoq aaqqiagiinngittarnerillu annikinnerulerlutik
Tasiilami meeqqat atuarfianni - Tasiilami Alivarpi - Pinnguarnermik ingerlatitsisut ukioq ataasingajak ingerlareerput. Pinnguarnermik ingerlatitsisut piumassutsiminnik sulipput anitsiartarfinnilu eqimattat assigiinngitsut pinnguartittarnerinik aaqqissuussisarlutik. Assersuutigalugu meeqqat anitsiartarfiup illuani rundboldertinneqarpata allat allami arsaatissapput.

Pinnguarnermik ingerlatitsisut maligassiuisuupput

”Massakkorpiaq ataatsimoorluni nipilersuummut qiteqatigiinneq nuannarineqarluarpoq, sila ajunngikkaangat. Nipilersuut atuartut ilinniartitsisullu akornanni nuannaalersitsisarpoq, taakku erinarsoqatigiillutik, qitillutik sungiusaqatigiinneranni. Pinnguarnermik ingerlatitsisut anitsiarfinni nuannisaarnerulernermik aaqqiagiinnginnerillu annikinnerulernerinik kinguneqartoq misigaarput,” oqarpoq Anette Broman Mølbæk, ilinniartitsisoq aammalu Tasiilami Alivarpimi ataqatigiissaarisuusoq.

Tasiilap nunaqarfiillu akornanni ikaartarfiliorneq
Pinnguarnermik ingerlatitsisut atuarfimmi ilisarnarluartuupput sweatshirteqaramik imaluunniit T-shirtseqartaramik qorsunnik.

”Nunaqarfiit atuarfiinut atisanik aamma pisivugut. Angorusupparput nunaqarfinni Pinnguarnermik ingerlatitsisut ukiup tulliani atuarneq aallartippat Tasiilaliarlutik pikkorissarnermut peqataajumaartut. Atuartut Tasiilami 8. klassissapput, taamaattumik nuannissaaq Pinnguarnermik ingerlatitsisut Tasiilap nunaqarfiillu akornanni ikaartarfilioqataasinnaasuuppata,”  Anette Broman Mølbæk oqarpoq.

Tasiilami Alivarpiup Atuarfiup aningaasaateqarfiata pinnguarnermik ingerlatitsisut suliaannut 5000 koruuninik aningaasaleeqqippoq.

Nunaqarfimmut angalaqataasut: Kristina Kâjangmat, Ulla-Maria Brandt, Agga Táunâjik & Iluuna Kristiansen.

Annertunerusumik paasisaqarusukkuit una attavigiuk:

Pinnguarnermik ingerlatitsisut sinnerlugit
Ilinniartitsisoq aammalu ataqatigiissaarisoq Anette Broman Mølbæk
Oqarasuaat +299 25 43 45
E-mail: anbm@sermersooq.gl