Lars Peter Hansen toqukkut qimaguppoq

Nuummi Ippiarsummi eqqissivoq. Lars Peter Hansen 67-inik ukioqarluni toqukkut qimaguppoq.

Lars Peter Hansen ukiuni 40-ni Nuup Kommuniani aamma Kommuneqarfik Sermersuumi sulivoq. Kommunimi ukiorpassuarni Materialgårdenimi aamma Asfaltiliorfimmi sulisuuvoq.

”Alianaqisumik Lars Peter Hansen toqukkut qimagussimasoq nalunaarfigitippunga,” Hans Henrik Winther Johannsen, Kommuneqarfik Sermersuumi Sanarfinermut Avatangiisinullu Ingerlatsivimmi pisortaq oqarpoq.

”Lars Peter Hansen suleqatiminit assut nuannarineqarlunilu ataqqisaavoq. Asfaltiliorfimmi aputaajaasutullu ukiuni 40-ni sulisuuvoq pikkorissoq patajaatsorlu. Kommuneqarfik Sermersuumi sulisut suleqatillu akornanni assut nuannarineqarpoq, tunniusimasuuvoq pisariaqartitsinerlu naapertorlugu sulinissaminut piareersimajuaannarluni”, oqarpoq Hans Henrik Winther Johannsen, naggasiullugulu Lars Peter Hansenip tunniusimaneranik assersuuteqarluni.

”Ukiorpassuit matuma siorna Danmarkimut sulinngiffeqarluni angalasussaagaluarpoq, bilitsinilu pisiarereeraa Ikuallaavimmi ingerlatsinermut aqutsisoq tassanngaannartumik soraarpoq. Lars Peter nangaassuteqanngivilluni sulinngiffissaraluani unitsiinnarlugu aqutsisuugallarpoq. Tamatuma takutilluinnarpaa sulisutut qanoq tunniusimatigalunilu tatiginartigisoq.

Eqqaaneqarnera ataqqinartuuli.