Asii: Nuummi innuttaasut kikkulluunniit najukkami ataatsimiititaliami pisariaqartippavut

Marlunngornermi pingasunngornermilu ajornanngitsunnguamik Nuummi najukkami ataatsimiititaliamut qinigassanngortissinnaavutit, Nuuk Centerimi aamma Qinngutsinni borgmesterip aammalu najukkami kommunalbestyrelsimi ilaasortat qinigassanngortinnerit tiguppassuk.

Illoqarfiit pingaarnersaanni najukkami ataatsimiititassamut qinigassanngortinnissat Kommuneqarfik Sermersuumit pisariillisarneqarpoq. Borgmesteri Asii Chemnitz Narup najukkamilu kommunalbestyrelsimi ilaasortat sinneri qinigassanngortinnissamut nalunaarfissanik illoqarfimmi agguaassapput, illoqarfiit pingaarnersaata illit Nuuk pillugu anguniakkannik iluaquteqarniassammat.

”Politikkimik imaluunniit peqatigiiffilerinermik misilittagaqartuunissat pingaarnerpaajunngilaq. Najukkami ataatsimiititaliaq politikkimut tunnganngilaq. Inuusuttut, inersimasut utoqqaallu ilaatikkusuppavut. Illoqarfimmi inunngorsimaguit imaluunniit illoqarfiit pingaarnersaannut nooqqammeruit qinigassanngortissinnaavutit. Nuuk pillugu misigissuseqarnissat, illoqarfitta nuannersup ineriartornissaa pillugu uummateqarfigalugu pinissat pingaarnerpaajuvoq. Nuummi najukkami ataatsimiititaliami illit illoqarfivit siunissamut illoqarfimmi innuttaasut assigiinngitsut peqatigalugit ilusilersueqataanissamut periarfissatsialaqarputit,” borgmesteri Asii Chemnitz Narup (IA) oqarpoq.

Marlunngornermi septembarip ulluisa 11-ni aamma pingasunngornermi septembarip ulluisa 12-ianni qinigassanngortinnissamut immersugassamik Nuuk Centerimi imaluunniit Qinngutsinni pisinnaavutit. Ulluni taakkunani marlunni nalunaaqutaq 16-18.

Najukkami ataatsimiititaliamut nutaamut ataasinngornermi septembarip ulluisa 17-ianni Katuami nalunaaqutaq 19-21 qinersisoqassaaq. Qinigassanngortittutut qinigassanngortinnerit kingusinnerpaamik septembarip ulluisa 14-ianni nalunaarutigissavat.

Nuummi najukkami ataatsimiititaliaq Nuummi suliniutinut ukiumut 4 millioner koruunit missiliorlugit atugassaqartinneqarpoq. Najukkami ataatsimiititaliaq tusarniaaffigineqartartussaavoq suliani Nuummut tunngasuni tamani, aamma Kommuneqarfik Sermersuumi kommunalbestyrelsimut siunnersuuteqarnissaminut periarfissaqarpoq. Qinigassanngortittut 10-t najukkami ataatsimiititaliamut nutaamut ilaasortanngussapput.

Suli paasissutissat aamma qinigassanngortinnissamut nalunaarfissaq uani pineqarsinnaapput