Innuttaasunut

Allat ikiorsinnaallugit tassa nuanneq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Bebiane Abrahamsen 32-inik ukiulik Nuummi angerlarsimaffimmi ikiorteqatigiit ilagaat.

– Isumaqarpunga suliffik pissanganartuusoq. Ukiup affaata missaa qaangiuppoq sulilerninnit. Ilaatigut ilungersunalaartaraluarpoq kisianni misigisakka nuannersut amerlanerupput. Sunniuteqaqataasinnaalluni assut nuannerami.

Bebiane Abrahamsen angerlarsimaffimmi ikiortitut sulinera malinnaaffigaarput.

Angerlarsimaffimmi ikiorti tassaavoq, inuit angerlarsimaffiannukarluni ikiuisartoq angerlarsimaffimmilu suliassat nalinginnaasut suliaralugit. Eqqiaanermut, inuup saligaatsuunissaanit ikiuisoq imaluunniit nakorsaatinik iisinissaanut ikiuisartoq.

Bebianip Abrahamsen-p pulaagaa siulleq tassaavoq Billiam Andreassen zz-nik ukiulik.

Bebiane: – Sinilluarpit?

Billiam: – Ilarpiit!

Bebianip Billiam oqaloqatigilaarpaa kingornalu sinittarfia eqqiarlugu aallartillugu.

Billiam: – 1972-mi Nuummut nuuppunga. Arnatsialannguaq naapikkakku katippugut. Ajoraluartumilli ukiut marlussuit qaangiupput toqukkut qimagummat.  Maqaasisaqaara.  Meeraallungali aalisariartalerpunga inersimasunngoramali kilisaatinut inuttaasalerpunga.  Suli tassa immamiittarneq maqaasisarpara.  Suliaq pikkunartorsuuvoq nuannersorsuullunili.

– Ullumikkut imatut suliaqartorsuunngilanga. Suliassaaleqisarnermit. Pisuttuartaqaangali. Timima aalatinnissaa pinerullugu. Naak arriitsunnguamik pisuttaraluarlunga, kisianni tassa pisuttuartarpunga.

Bebiane: – Inulerisutut sulilluni assut nuannerpoq. Inuunermut kajumissinartuuvoq.  Maannakkorpiaq ilinniagaqanngitsutut sulivunga kisianni peqqissaasut ikiortiattut ilinniagaqarusuppunga.  Ukiamut aallartissaanga.  Inulerineq pikkoriffiginerulerusuppara aamma iisartakkanik passussineq ilinniarusuppara.

Bebiane Abrahamsen inissiami illuleraluni ulapippoq, Billiam aperaa iisartakkami iinissaat eqqaamasimanerai.

– Arlaannik allamik ikiugassaavit, aperaaq.

Billiammili naaggaarpoq.

Inuulluaqqupput qaatiguulerlunilu eqqaavik annippaa. Tamassuma kingorna angerlarsimaffimmi ikiortimik pulaarneqartussaq tulliuttoq ornillugu.  Tamatumuuna arnaq utoqqasaaq pitsorluttoq pulaartussanngorpaa.

– Uuma takullutit nuanneq, arnaq utoqqasaaq oqarpoq.

– Tassaana ikiortinnguaq 100 kruuninik tuniniaraluarakku pikkorillunilu sullarippallaaqimmat kisianni tigujumaneq ajoramigit. Assorsuaq ikiorneqartarnera qujamasuutigisaqaara, oqarpoq.

Bebiane Abrahamsen inissiaq eqqiarlugu aallartippaa.

Ulloq naanngitsoq Bebianip innuttaasut utoqqaanerit allat marluk angerlarsimaffiannut ikioriartorlugit pulaarpai. Naammassigami allaffimmut uterpoq.

Kommuneqarfik Sermersuumi innuttaasut 160 missaanniittut angerlarsimaffimmi kiffartuunneqartarput. Angerlarsimaffimmi ikiortimik kiffartuunneqarnissaq kissaatigigaanni kommunimut saaffiginninnikkut pissarsiarineqarsinnaapput.

Bebianetuulli utoqqarnik sullisserusukkuit kommunimut tutsaqarsinnaavutit. Narsaviaq 26-mut ornigussinnaavutit områdeleder Casper Haase attavigalugu imaluunniit immikkoortortaqarfimmi pisortaq Lena Holm.