Piniarnermut akuersissutit aaneqarsinnaalerput

Tuttunik umimmannillu piniarnermut akuersissutit maanna aaneqarsinnaalerput

1. august nalliutigajalerpoq, tamannalu isumaqarpoq tuttunik umimmannillu piniarfissanngungajalersoq. Ullumimiit najukkanni innuttaasunik kiffartuussivimmut piniarnermut akuersissut aasinnaavat.

Inuussutissarsiutigalugu piniartunut tuttunniarneq piffissami 1. august – 15. oktober ingerlassaaq, sunngiffimmilu piniartunut 1. august – 30. september. Inuussutissarsiutigalugu sunngiffimmilu piniartut tamarmik umimmaat umimmaqarfimmit Maniitsumeersut piniarsinnaavaat, tassanilu piniarnermut piffissaliunneqarsimavoq 1. august – 15. otkober. Aalisarnermut, Piniarnermut Nunalerinermullu Naalakkersuisoqarfimmit malugeqquneqarpoq kulavaat norrallit tiggaallu tammajuittussarsiniarluni piniagaasut piniagaanngimmata.

Sunngiffimmi piniartuuguit Nuummil najugaqarlutit maluginiassavat tuttunniarnissamut akuersissut sorleq qinnutigissanerlugu. Tuttoqarfinnit Akia – Maniitsoq, region 3 aamma Ameralik, region 4 imaluunniit Qeqertarsuatsiaat, region 5 tuttunniarnissamut akuersissummik piniarfigisinnaavatit. Imaappoq region 4-mi tuttunniarnissamut akuersissummik pisimaguit region 5-mi akuersissummik pisinnaanngilatit.

Ivittuuni inuussutissarsiutigalugu piniartut akornanni umimmanniarnissamut akuersissutinik makitsisoqassaaq.

Sunngiffimmi piniartut tuttunut umimmannulluunniit piniarnermut akuersissummik piniarunik, sunngiffimmi piniarnermut allagartartik 1. maj 2018 nallertinnagu akilereersimassavaat. Pniarnermut akuersissut inunnut ukiuni 10-ni kingullerni ukiut 2 ingerlanerini Kalaallit Nunaanni najugaqartutut nalunaarsorsimasunut taamaallaat tunniunneqarsinnaapput.

Pisanik nalunaaruteqartarneq

2017-mi tuttoqarfinni Akia – Maniitsoq aamma Ameralik tuttunniarnissamut akuersissutit 1022-it tunniunneqarsimapput, taakkunanili 491-it kisimik utertinneqarsimallutik. Namminersorlutik Oqartussanit nalunaarutigineqarpoq akuersissutinik utertitsinngitsoortarneq, piniartunut pineqartunut siunissami akuersissummik pisinnaanermik ajornakusoortitsilersinnaasoq.

Tuttut aamma Umimmaat 2018