Ilaatigut apeqqut taanna qaqinneqarpoq, Transparancy International Greenland Kommuneqarfik Sermersuumi Paamiuni pikkorissaasoqarnerani
Sulisut 15-t missaanniittut pikkorissanermut peqataapput. Kommuneqarfik Sermersooq kommunini kisiartaalluni Transparancy International Greenlandimi ilaasortaavoq.
Pikkorissaaneq Bodil Karlshøj Poulsenimit Irene Jeppson-millu ingerlanneqarpoq.
Qanoq iliortoqassava sulisuusutut atuisumit ilaqutaasumilluunniit neqerooruteqarfigineqaraanni? Qanoq iliortoqassava suliassamut arlaatigut peqataanikkut attuumassuteqaruni imaluunniit attuumassuteqartoq qanittumik ilaqutariguniuk? Qanoq iliortoqassava qinikkatut inissisimasoq soqutigisanut immikkuullarissunut attuumassuteqarpat?
Ilaatigut apeqqutik taakkua eqqartorneqarput.
– Pikkorissaanermut peqataasut soqutiginnilluarput apeqquteqallattaasarlutillu. Inuiaqatigiinni ikittunnguusuni pingaaruteqarpoq ammasumik ingerlariaaseqarnissaq, soqutigisammi akunnattoortitsiviusinnaapput soqutigisaqarnerlu peqqutigalugu aporaattoqarsinnaasarluni, Irene Jeppson oqarpoq.
– Qanigisami demokratiimut kommunillu ingerlatsinerannut tatiginninneq sanngiillisinneqassaaq, peqquserluttoqartoq paasineqarpat. Killormulli tatiginninneq qaffassarneqassaaq, kommunit ingerlatsinermikkut takutippassuk, sullissinerit, oqartussaasutut aqutsinerit aammalu politikkikkut tunngavissanik aaliangiisarnerit, ammasumik, inatsisit malillugit nakkutigineqarsinnaasumillu ingerlanneqarpata.
– Tullinnguuppoq Nuummi sulisunut pikkorissaanissaq ukiarulu aamma Tasiilami kommunimi sulisut pikkorissarnissaat, Irene Jeppson oqarpoq.
Transparancy International Greenland 70-t missaanni ilaasortaqarput, siulersuisullu aningaasarsiaqaratik ingerlapput.