Kommuneqarfik Sermersuumi kommunalbestyrelsip mittarfiliortitsinissaq tapersersorpaa

Kommuneqarfik Sermersuumi kommunalbestyrelsi, pilersaarutigineqartut malillugit Nuummi 2200 meterisut takitigisumik mittarfiliortitsinissap ingerlanneqarnissaanik, Inatsisartunut Naalakkersuisunullu kaammattuuteqarput.

Nuummi mittarfimmik nunanut allanut ingerlavigineqarsinnaasumik ilimasuuteqarnerup, illoqarfiit pingaarnersaanni aningaasaleerusussuseq qanoq sunnersimaneraa ukiuni kingullerni maluginiarsimavarput.

Mittarfiup malitsigisaanik Nuuk namminersortunit aningaasanik milliardikkaanik aningaasaliiffigineqassaaq namminersortunillu suliffissat uuntritillit arlallit pilersinneqassallutik.

Nuuk ornitassatut aningaasaliiffiginissaanullu imminut akilersinnaasutut, aningaasaliisartut piffissaq sivisooq atorlugu killinniarsarineqarsimavpput. Siunnerfeqartumik sulinitsigut aamma Colorful Nuuk suleqatigilluarneratigut, Nuuk nunarsuup sinnerani takornarissanut ornitassatut kusanartutut misigasassaqarfiulluartutullu ilisimaneqalersimavoq, tamatumalu aamma malitsigivaa takornarialerisut amerlanerit illoqarfiit pingaarnersaanni ilinniartissinnaalersimagatisigit. Tamannarpiaq tunngavigalugu, mittarfiliortitsinissamik pilersaarutit kinguartinneqassappata unitsinneqassappataluunniit, annertuumik kingunipilutsitsissaaq. Tamannami aningaasaliisartunut nunanit tamaalaaneersunut oqariartuutaassammat Kalaallit Nunaat tatigineqarsinnaanngitsoq.

Mittarfiliortitsinissap eqqartorneqarnerani aningaasaqarneq annertuumik oqallisaasimavoq. Pineqartumili oqaluuserisassatsinnik aamma allaqarpoq.

Billitsit akikinnerusut innuttaasunut amerlasuunut annertuumik sunniuteqassapput, taakkumi nunarsuup sinneranik misigassarsiorsinnaalissammata, ilaquttatilluunniit takukulanerulerlugit. Billitsit akikinnerulerpata, nunani allani ilinniartortattagut ilaquttatik attaveqarfiginerunissaannut akissaqalissapput, billitsillu akikinnerusut, suliffeqarfiit ilinniarluarsimasunik sulisussarsiornerannik annertuumik ajornaallisaatissavaat.

Mittarfeqarnerput 40-ukkunni sorsunnerup nalaanut tulluussarlugu sanarfineqarsimavoq. Piffissaq eqqissineqarfiusoq ineriartorfiusorlu eqqarsaatiginagit. Angallannermik aporfissat nuna manna ukiorpassuarni siumut ingerlaqqinnaveerlugu pituttorsimavaat. Ingerlariaqqinnissatsinnut aalajangernissatsinnut piffissanngorpoq.

Kommunalbestyrelsi