Timersorneq soqutigineqarnerulertariaqarpoq

– Suli amerlanerit timersortariaqaraluarput taamaattumik håndboldskolet timersuutillu allat tapersersorneqartariaqarput, Jakob Larsen oqarpoq

Jakob Larsen ukiuni arlalinni assammik arsartartut akornanni pikkorinnerit ilaanniissimavoq nunatsinnilu aamma nunanut allanut unammisartuni arsaqataasarsimalluni. Ulluinnarni HTH Go Ligami Nykøbing Falster Håndboldklubbimi arsartartut sungiusartarpai. Ullunilu makkunani ilaquttani ilagalugit Nuummiippoq håndbodskole-mi sungiusaasutut atorfeqarluni, håndboldskole ilaatigut Kommuneqarfik Sermersuumiit aningaasaliiffigineqarsimavoq.

Jakob Larsenip timersornerup siunissaa ernumatigivaa.

– E-sport nunatsinni atugaaleraluttuinnarpoq, aammami nunani allani. Elektronisk sport tassaavoq qarasaasiaq atorlugu meeqqat inuusuttullu spillerlutik unammiuaartarnerat. Aamma takusinnaavarput timersorneq soqutigineerukkiartortoq. Meeqqat inuusuttullu timimikkut piginnaasaat ukiunut siuliinut sanilliullugu ajorseriartorpoq. Meeqqat ilungersornerulerput qasujanerulerlutillu.

-Taamaattumik nuannerpoq takullugu håndboldskolet taamak soqutigineqartigimmata. Ukioq kingulleq 75-t peqataapput 200-llu naaggaaginnartariaqarsimavagut. Ukioq manna 145-t peqataapput. Inussuvik attartorparput kiisalu aamma minihal Atuarfik Hans Lyngelu.

Peqataaneq akeqanngilaq. Amerlanerit peqataatikkumallugit aaqqissuisut aalajangersimapput håndboldskole marlunnut avinniarlugu. Håndboldcamp meeqqanut assammik arsartareersunut kiisalu håndboldskole aatsaat misiliisunut.

Pikkorissut

Team Håndboldskoleminngaanniit Kalaallit Nunaanni assammik arsallaqqinnerpaat ilaat aperineqarsimapput meeqqanik sungiusaasinnaanersut. Ilaatigut tassaapput Minik Dahl Høegh, Akutaaneq Kreutzmann, Isak Olsen kiisalu siornatigut assammik arsartartuni tusaamasat ilaat Peter Sikemsen. Jakobip nulia, Kamilla Kristensen aamma peqataavoq. Taanna ulluinnarni Odense håndboldimi unammeqataasarpoq.

– Sungiusaasut tamarmik håndboldskolemut peqataasareernikuupput. Neriuppugullu peqataasut akornanni timersornerup aallunnissaanut soqutiginnittoqalissasoq, Jakob Larsen oqarpoq.

Maligassiuisut

Alex Nørskov aaqqissueqataasunut peqataavoq, taassumallu håndboldskolep soqutigineqarluarnera nuannaarutigivaa.

-Peqatataasut tamarmik kiateeqqamik tunineqarput, qarleeqqat, imerfik, arsaq kiisalu nerisassat peqqinnartut. Nerisassiortunik arfinilinnik suleqateqarpugut taakkulu peqqinnartunik nerisassiortarput håndboldskolep ingerlanneqarnerani.

– Ernera 11-nik ukiulik håndboldskolemut peqataavoq ippassaanilu tanngassimaarluni angerlarpoq oqaluttuarluni Minik Dahl Høeghmit Akutaaneq Kreutzmannmillu sungiusarneqarsimallutik. Neriuppugut meeqqat akornanni timersornerup aallunnissaanut soqutiginnilersitsisinnaassalluta.

-Assammik arsarneq timersornerinnaanngilaq. Kisianni aamma naleqartitanut pitsaasunut ilaalluinnarpoq. Holditut suleqatigiinneq, pinngitsoorani takkuttarnissaq, nerisassanut pitsaasunut peqqinnartunullu ilisimasaqalerneq, pissusissamik malinnilluarsinnaaneq, kiisalu aamma inunnut attaveqarneq ikinngutitaartornerlu aamma akuulluinnarput. Pinaveersaartitsinermut tunngasorujussuuvoq, Alex Nørskov oqarpoq.

Nammineq aamma nunattta landsholdianut peqataasarnikuuvoq.

– Timersoqqittalerpunga, tamatumuuna utoqqasaani. Unammisartutoqqat arlaliulluta uteqqinnikuuvugut. Ukkatarisarpulli tassaavoq timersuutip soqutigineqaqqilernissaa. Taamaattumillu inuiaqatigiinninngaanniit tapersersorluarneqarnissaq pisariaqarluinnarpoq, håndboldskole iluatsittumik ingerlanneqassappat. Takorluugarput piviusunngortikkusutarpullu tassaavoq ukiumut marloriarluta håndboldskolep ingerlanneqartalernissaa, aasakkut ukiakkullu, Alex Nørskov oqarpoq.

Nuup saniatigut pilersaarutaavoq håndboldskole aamma Ilulissani, Maniitsumi Qaqortumilu ingerlanneqassasoq.