Februaarimi Atuarfik Hans Lyngemi atuartuni akullerni Ipadinik misileraatitut suliniummik aallartitsisoqarpoq. Ilinniartitsisut 14-it atuartitsinermi Ipadip atornissaanut pikkorissarput taakkununnga ilaavoq Mette L. Willumsen.
– Ipadi aqerluusaasiviup ilaatut isigineqassaaq. Ilikkarnissamut atugassaavoq. Atuartunut amerlanernut Ipadip atornera kajumissaataavoq atuartut atuarnerminni malinnaaniarnerminnik unamminartitsisut aammali atuartunut malinnaasunut.
– Atuartut amerlanerit piginnaasaat takusinnaavakka. Atuartuuteqarpugut naqinnernik ilisarinnissinnaanngitsumik massakkulli qanoq pikkoritsiginermi takutinnissaanut periarfissaqalerpoq. Ipad atorlugu titartaasinnaavoq oqalullunilu. Nuanneq ineriartortoq takullugu. Naqinnernik ilisarinnissinnaannginnera ilisimavara, nalinginnaasumilli atuartitsinermi piginnaasaminik takutitsiniarnera ajornakusoorsimavoq. Massakkut qanoq piginnaaneqartiginerluni takutissinnaanngorpaa malugisinnaavaralu inuttaa imminut tatiginerulertoq naleqartinnerulerlunilu. Atuartitsineq kajumissuseqalersitsisarpoq Ipadilu atoraangatsigit meeqqat peqataanerulersarput.
– Atuartut malinnaalluartut iluatsilluartumik aamma misigisaqarput. Suliassamik ingerlassinnaasaannik tunisarpakka. Namminersorneroqaat Ipadimillu atortorissaarutinik periarfissai atorlugit unammillerneqartarput. Tassuuna meeqqat atuarnermi malinnaaniarnermik unamminartitsisut ikiornissaanik periarfissaqalerluartarpunga. Tamanna ilinniartitsisutut piumassutsinnut naammagisimaarnerujussuarmik tunniussisarpoq.
– App’inik assigiinngitsorpassuarnik peqarpoq. Atortakkatta ilagaat BookCreator maannakkullu qallunaatut ”oqariartaatsit” ilaatigut sammivagut. Atuartut atortut assigiinngitsut soorlu nipit, filmiliat assillu atorlugit suliaqarsimapput. Perianngitsoq oqariartaatsit assigiinngitsut 26-t akornatsinni aveqatigiissinnaalerpavut isumassarsiorfigalugillu, Mette L. Willumsen oqarpoq.
Nuanneqaaq
Alberthe Brandt qulinik ukiullip atuarfimmi Ipadip atornera nuannaraa: – Uagutsinni taamaattumik peqarpunga, taannali youtubemit isiginnaassutigisarpara. Atuarfimmi pappilissat aqerluusallu atortaraluarpavut Ipadili atorlugu pitsaaneroqaaq. Inussagut atorlugit tagiaannartarparput. Nipiliorsinnaavugut, videoliorluta assinillu ikkussuilluta.
– Ilinniartitsisumit ikiorneqarpallaartariaqanngilanga aamma. Namminersornerujussuuvugut Alberthe Brandt naggasiivoq.
Kalaallit Nunaani kommunit tallimat ataatsimoorlutik atuarfinni suliniummut nutaamut 200 millionit koruunit sinnerlugit naleqartumut aallartitsipput. Suliniummi teknologi digitaliseeriinerlu pingaaruteqaqaat. Nunatsinni atuartut, ilinniartitsisut ilinniartitsisunngorniallu tamarmik Ipadinnassapput.