Lisathe Møller Kruse Sumiiffiit aqquserngillu taaguutaannik siunnersuisoqatigiinni siulittaasunngorpoq. Frederik Holm siulittaasumut tullersortinngorpoq.
Kommuneqarfik Sermersuumi Sumiiffiit aqquserngillu taaguutaannik siunnersuisoqatigiit inissitsiterlutik ataatsimeeqqammerput. Siulittaasup siulittaasullu tulliata toqqarnerisa saniatigut, siunnersuisoqatigiit Paamiuni ivigaasanik arsaattarfiup atissaanik siunnersuutit suliarivaat. Siunnersuutit qulingiluat Paamiuni najukkami ataatsimiititap tigusimavai. Taakunannga pitsaanerpaat pingasut ataatsimiititap toqqarsimavai, taakkulu Sumiiffiit aqquserngillu taaguutaannik siunnersuisoqatigiit suliarisimalerpaat. Atsiunneqartussaq piaartumik aalajangiiffigineqassaaq.
Sumiiffiit aqquserngillu taaguutaannik siunnersuisoqatigiit Kommuneqarfik Sermersuumi kommunalbestyrelsimut siunnersuisartuupput. Siunnersuisoqatigiit pingaarnertut suliassaraat illoqarfinni sumiiffiit aqquserngillu atissaannik siunnersuuteqartarnissaq.
Sumiiffiit aqquserngillu taaguutaannik siunnersuisoqatigiit tulliani ataatsimiilerpata ilaatigut, Nuummi aqquserngit kaajallattarfiit atsersorneqarnissaat aqqusinermillu Lars Miilu Lundimik atsiinissaq suliarissavaat.
Inissitsiterluni ataatsimiinnermi siunnersuisoqatigiinni ilaasortat tamarmik peqataapput.
Siunnersuisoqatigiinni tassaapput:
- Mariane Petersen, Translatøri
- Lisathe Møller Kruse, Oqaasileriffimmi immikkut Siunnersorti
- Frederik Holm, Illussanik Titartaasartoq Nuummilu innuttaq
- Tittus Dalager, Bygningskonstruktør aamma Sanarfinermut Avatangiisinullu Ingerlatsivimmi atorfilik
- Johannes Heilmann, NAPP-mit aallartitaq (Nuummi aalisartut piniartullu peqatigiiffiat)
- Salik Hard, Nuummi Sunngiffimmi Aalisartut Piniartullu Peqatigiiffiannit aallartitaasoq