Inuusuttut Tasiilameersut 4-t Norgemi kulturfestivaleqarnermi peqataapput

Tasiilami Inuusuttut Kulturikkut Illuat aamma Kalaallit Røde Korsiat – INUA (ataatsimoornermi inuusuttut nukittortarput) maanna Hamar, Norgemi festivalimut, Stoppested Verden-mik atilimmut peqataaleruttorput.

”Aatsaat siullermeerluta nunat tamat nalliuttorsiualaarneranni peqataavugut, Tasiilamiillu peqataasut sisamat Tunup avammut saqqummiunnissaa assut pissanngatiginikuuaat”, Mia Skifte Lynge, Tasiilami Inuusuttut Kulturikkut Illuanni aqutsisuusoq oqarpoq.

Stoppested Verden assigiinngisitaartunik festivaliuvoq, nunarsuarmi naalagaaffiit arlallit ukiut qulissaannik kulturiminnik saqqummiiffigisartagaat. Festivalip nunarsuarmi inuusuttut ataatsimoorfissaqarnissaat siunertarivaa, tusarnaartitsinerit, workshopeqartitsinerit, sammisaqartitsinerit, isiginnaartitsinerit saqqummersitsinerillu aqqutigalugit kulturikkut assigiinngisitaartuunertik qitiutillugu imminnut ilisareqatigiiffigisinnaasaat.

Festivalimi Tasiilamit peqataasut ilaatigut tunumiut qilaatersortarnerannik, ileqqorsuutinik aammalu kalattuunik isiginnaartitsissapput. Festivalimi aamma assit Tasiilameersut inissaqartinneqarput nivingatinneqassallutillu, peqataasullu ilaat festivalertoqarnerani tunumiut qilaataannik sanasoq malinnaavigineqarsinnaalluni.

Mia Skifte Lynge, angalanermi aamma peqataasoq, itisiliivoq: ”Angalanermi Tunumi kulturip saqqummiunneqarnissaa siunertaavoq, aammali attaveqaatissat misilittagaqalernissarlu siunertanut ilaalluinnarput. Ataatsimoorluta misigisaqarnerput assut nuannerpoq. Angalanermi matumani kulturerput nittarsaatissavarput, peqatigitillugulu isumassarsianik illoqarfigisatsinni siunissami atorluarsinnaasatsinnik pissarsiaqarsinnaalluarpugut.”

Festivali ulluni 2. aamma 3. juuni ingerlanneqarpoq. Angalaqatigiit festivaleqarnissap tungaanut Hamar paasisassarsiorfigalugulu festivalimut piareersarnikuupput.

Festival Stoppested Verden annertunerusumik paasisaqarfigisinnaavat nittartagaa iserfigalugu: http://www.stoppestedverden.no/

Angalaqatigiit kulturfestivaleqarnerani misigisaat malinnaavigisinnaavatit kommuneqarfik Sermersuup Instagram-profilia iserfigalugu.