Ilisimatuup Norgimeersup, sullorsuaq pitsaasutut nalilerpaa.
Nuup Nuussuullu akornini sullorsuaq pilersaarutaasumit siusinnerusukkut ammassaaq. Sullorsup angallaffigineqarnera tamarmi 13. april matuneqarpoq, ujaqqanik nakkaasoqarsinnaaneranik aarleqquteqarmat, pisuinnartunulli cykkilinillu angalasunut, putorsuaq 11. maj ammartussanngorpoq. Sullorsuup matoqqanerani aqqusineq sermersimammat, ullut 14 aatsaat qaangiuppata sullorsuaq biilinik angallaffigineqarsinnaalissaaq.
Ingerlatsinermut Avatangiisinullu Immiikkoortortaqarfiup ernummatigisimagaluarpaa sullorsuup qaammatit pingasut tikillugit matoqqatinneqartariaqarnissaa, tamannali allanngorpoq, sapaatip akunnerata naanerani sullorsuaq Norgemi Rambøllimit siunnersortimit misissorneqareersorlu.
”Nalunaarfigineqarpugut sullorsuaq pitsaasoq, qaarsumilu qajannaatsumi sanaajusoq, marlussunnilli eqqumaffigisassaqarpugut. Ajornartorsiutaasinnaasut sapaatip akunnerata naanerani suliarineqarput, maannalu sullorsuup salinnera suliarivarput”, Ingerlatsinermut Avatangiisinullu pisortaq Frank Rasmussen oqarpoq.
Sullorsuup aserfallatsaalineqarnissaanut pilersaarut Rambøllimit aamma suliarineqarsimavoq, sullorsuup ukiuni qulikkaani aggersuni ajornartorsiutitaqanngittumik atorneqarsinnaaneranut qularnaarisussaq.
”Sullorsuup aserfallatsaalineqarnissaanut pilersaarutip malitsigissavaa, ukiut tamaasa julip qaammataani angallattoqarfiuallaanngitsumi, sullorsuup sivikitsumik matoqqatinneqartarnissaa. Aamma pisariaqassaaq nuna qeriunnaaraagat sullorsuup sivikitsumik matoqqatinneqartarnissaa”, Frank Rasmussen oqarpoq.
Biilit aqqutaanit sermik piiarnissaa qanoq sivisutiginissaanut sila apeqqutaassaaq. Sullorsuaq biilinik angallavigineqaqqissinnaalerpat Kommuneqarfik Sermersooq nalunaaruteqarumaarpoq.