Ukiuni 28-nki angajoqqaarsiaasartunut qujassut

Poul aamma Liva Hansenimut Kommuneqarfik Sermersooq qujassuteqarpoq. Kalaallit Nunaanni ukiuni 28-ni angajoqqaarsiaareerlutik aappariit Danmarkimut nuulerput.

Poul aamma Liva Hansen 1990-imili angajoqqaarsiaasarsimapput. Pisariaqartitsisoqaleraangat aappariit piareesimasarsimapput. Paamiuni ukiut 28-t matuma siorna aallartipput, tamatumalu kingorna ilaqutariit Hansenikkut Nuummi meerarsiaqarnissaminnut matuminnik ammaasimapput. Aappariit ima amerlatigisunik meerarsiaqarsimapput, allaat qassiorpiaanersut nalornissutigilaarlugu.

”Qulit sinneqarput,” Poul Hansen oqarpoq. ”Immaqa 20-t,” Liva Hansen nangillugu oqarpoq, apeqqummut akissutissaminnik eqqarsaatigalutik.

”Meeqqat piaartumik inissinneqartussat aamma meeqqat sivisunerusumik inissinneqartussat paaqqutarisarsimavavut. Pisariaqaleraangat ikiuuttarsimavugut,” Liva Hansen itisiliivoq.

Angajoqqaarsiaalluni suna nuannernersaava?

”Meeqqanut paaqqutarisatsinnut ikiuuttarsimangatta,” Liva Hansen oqarpoq uiatalu nangippaa: ”Eqqissinermik tunisinnaallugit,” Poul oqarpoq. ”Aap, eqqissinermik tunisinnaallugit pingaarnersaavoq,” Liva uteqqiivoq.

Meerarsiat qanoq eqqissinermik tunineqartarpat?

”Toqqissisimanartumik avatangiiseqartillugit,” Liva Hansen oqarpoq. Poul nangippoq: ”Toqqissisimanartumut pigaangamik aamma iluminni eqqissisimalersarput. Meeqqat eqqissisut takullugit misigisaavoq tupinnartoq. Ilaanni naapeqqaaraangatsigit annilaangasarput kamaqarlutilluunniit.”

Liva assersuusiorpoq: ”Ilaanni meeraarannguamik marlunnik ukiulimmik nuannaaqarani aliasuttumik uatsinniittoqalerpugut. Sulianik sullissisutta ullut 14-it qaangiummata pulaaqqimmatigut takusani uppererpiarsinnaanngilai. Sapaatit akunnerini marlunni eqqissisimalluni toqqissisimallunilu uatsinneereerluni meeraq erinarsortuinnaavoq qimakkumanangalu.”

Qasusuillutik tunniusimasut
Kommuneqarfik Sermersooq ilaqutariinnut Hansenikkunnut qujassuteqariartormat kaffillerlutillu kaagillerput oqaluasaarlutillu. Ellen Magnussen, Pitsaaliuinermut immikkoortortami pisortaagallartoq, naasunik tunissutinnguamillu tunniussinnginnermini aappariit oqalugiarfigai.

Ellen Magnussen, sooruna kommunip Poul aamma Liva qujassuteqarfiginiarai?

“Tassa ukiorpassuarni qasusuillutik meerarpassuarnut angajoqqaarsiaasarsimammata. Meeqqanut paaqqutaminnut annertoorujussuarmik suliniuteqartarsimapput. Meeraateqaleraangatta isumagineqartariaqartunik aamma toqqissisimasunik eqqissisimasunillu sinaakkuteqarnissamik pisariaqartitsillutillu ikiorneqartariaqaraangata ikiuuttarsimapput.”

Taakku ikiuuttarnerisa ilisarnaataat suuppat?

“Qasusuinnerat, tunniusimanerat, naammangittarsinnaassusaat meeqqanullu asanninnerat – namminneq meeqqami saniatigut – pingaaruteqarsimaqaaq, assorujussuaq. Piaartumik inissinneqartariaqartunut aamma ukiorpanni inissinneqartussanut angajoqqaarsiaasarsimapput, taamaammat meerarpassuarnut pingaaruteqarsimaqaat.”

Aappariit Danmarkimut Birkerødimut juunip aallaqqaataani nuussapput, tamannali imaattariaqanngilaq aappariit meerarsianut tunngaviujunnaartut.

”Suli naammassinngilagut. Panissiarput ilaginiarlugu qinnuteqarsimavugut. Taannami ilaarusuppoq, aamma sulianik sullissisoq akerliunngilaq, taamaammat nerioqaagut ilagissallugu. Tamannami ajussanngikkaluaqaaq, tassami nuussimalereerutta Danmarkimi efterskolimi aallartissaaq,” Liva Hansen naggasiivoq.