Pisortaagallartoq Hans Henrik Winther Johansen atorfinivitsinneqarpoq.
Kommuneqarfik Sermersuumi Aningaasaqaarnermut ataatsimiititap, sisamanngorneq 26. april, Hans Henrik Winther Johansen Sanarfinermut Avatangiisinullu Ingerlatsivimmi pisortatut atorfinitsippaa. Taassuma atorfik siorna 1. novemberimiilli tigummigallarsimavaa.
Hans Henrik Winther Johannsen 48-nik ukioqarpoq, ingeniøritut angallannermillu pilersaarusiortutut ilinniarsimalluni. 2011-miilli Kommuneqarfik Sermersuumi sulisimavoq. Siullermik angallannermik pilersaarusiortutut, 2014-miillu sulisunut pisortatut.
Pineqartup ulluinnarni aqutsisuniiginnarnissaa borgmester Asii Chemnitz Narupimit nuannaarutigineqarpoq.
”Sulisut pisortaattut pisortaagallartutullu Hans Henrik angusaqarluarsimavoq. Ingerlatsiviup innuttaasunik sullissinera qaffassarsimavaa, kommunimilu inuussutissarsiortunik suleqateqarneq pitsaasumik siunertaqarluartumillu ingerlatilersimallugu. Taamaammat siunissami Sanarfinermut Avatangiisinullu Ingerlatsivimmi siuttuuginnartussanngornera toqqissisimanareqaara,” Asii Chemnitz Narup oqarpoq.
Kommuneqarfik Sermersuup ineriartornera ukiuni arfineq marlunni suleqataaffigereerlugu, Hans Henrik Winther Johansenip atorfittaani atorfitsialattut taarusuppaa.
”Arlalinnik politikkikkut suliassinneqarsimavugut, taakkulu aallartinnissaat qilanaareqaara. Kommuneqarfik Sermersooq inuussutissarsiortunut innuttaasunullu suleqatitut inissisimassaaq. Uagullu suliassaraarput, kommunimi ineriartortitsinermut alliartortitsinermullu atugassarititat pitsaasuutinnissaat, illoqarfiup innuttaasui oqaluttuassartaalu puigornagit,” Hans Henrik Winther Johannsen oqarpoq.