Innuttaasunut

Kommuneqarfik Sermersuumi isumaginnittoqarfik aqqutigalugu inissamik tunineqarnissamut malittarisassat erseqqinnerusut

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Isumaginnittoqarfik aqqutigalugu inissamik tunineqarnissamut tunngatillugu ileqqoreqqusami pineqarpoq qinnuteqartut inuunermi atugarisaminnik pissuteqarlutik isumaginnittoqarfik aqqutigalugu inissiamik tunineqarnissaannut tunngaviit. Ileqqoreqqusaq kommunalbestyrelsip kingullermik ataatsimiinnerani akuerineqarpoq.

Ileqqoreqqusat 2008-meersut maanna nutarterneqarsimalerput siunissamilu uppernarsaataassallutik Kommuneqarfik Sermersuumi isumaginnittoqarfik aqqutigalugu inissiamik innersuussinissamut erseqqissunik malittarisassartallit.

”Pingaaruteqarpoq suleriaatsit innuttaasunut iluaqutaasinnaaqqullugit ileqqoreqqusami erseqqissumik nassuiarneqarsimanissaat paasiuminartuunissaallu,” oqarpoq Charlotte Ludvigsen (IA), Isumaginninnermut Suliffeqarnermullu Ataatsimiititami siulittaasoq.

Isumaginnittoqarfik aqqutigalugu inissiamik tunniussinissamut piginnaatitsissut aallaaviatigut Ittoqqortoormiini, Tasiilami, Paamiuni Nuummilu inissamik innersuussisartunit (BVU) isumagineqartarpoq.

Inuit isumaginnittoqarfik aqqutigalugu inissiamik tunineqarsinnaasut ilaatigut tassaapput:

  • Angajoqqaatut oqartussaassuseqartut sanngiitsunik meerartaqarlutillu inuusuttortaqartut – taakkununnga ilanngullugit inissinneqarsimasunik meerallit
  • Inuusuttut sanngiitsut paaqqinnittarfiup avataani inooqqilernissaminnut sungiusartut imaluunniit suliniuteqareernermi malitseqartinneqartut
  • Inuit timimikkut tarnimikkulluunniit nappaatillit imaluunniit piginnaasakillisimasut
  • Inuit iliuuseqarfigineqartussatut piginnaanngorsaqqinneqartussatullu pilersaarusiorfigineqarsimasut – taakkununnga ilanngullugit inuit atornerluisuunerminnik katsorsartittut imaluunniit pineqaatissinneqarsimallutik inissiisarfiup avataani inooqqilernissamut sungiusartut

Ileqqoreqqusaq nutaaq atuaruk