Dronningip inuuissiornera qamutilittarnermik seqinnarimmillu nalliuttorsiutigineqarpoq

Ataqqinartorsuaq Dronning Margrethe II-p 78-iliilluni inuuissiornera ataasinngormat Nuutoqqami qamutilittartunit, inunnik qungujulasunit, poo’lunit kakaavinillu nalliuttorsiutigineqarpoq, soorlu aamma pisarnertut erinarsortoqarlunilu nipilersortoqartoq borgmesterimillu Asii Chemntiz Narupimit oqalugiartoqarluni.

Nalliuttorsiornerup nalaani seqineq qilammi allaaqqissumi qullasinnerpaaminiippoq, najuuttulli ulussamikkut soorlu malugisinnaagaat, issittup anoraa dronningimut aamma inuulluaqquserusussimavoq. Meeqqat persuarsiortut uuntritillit arlallit hurraartormata, suaartarnerat imak nipitutigaaq, allaat avannap meeqqat uluaannik tiguaasimanini iperaamilaartariaqarsimavaa.

Nalliuttorsiornerup oqalugiaatiginerata saniatigut, borgmester Asii Chemnitz Narupip ilanngullugu eqqaavaa kunngissap qanittumi 50-iliilluni inuuissortussaanera, soorluttaaq Prins Henriup qanittumi toqukkut qimagunnera eqqaaneqartoq, Kommuneqarfik Sermersuumi innuttaasut matumani Dronningimut inuulluaqusisimanerannut qamannga pisumik qutsavigiutigalugit.

Pingaarnertulli borgmesterip oqalugiaatimini sammivaa dronningip Kalaallit Nunaannik eqqumiitsuliornermillu nuannarisaqarnera – taakkulu dronningip eqqumiitsuliaani ataatsimut takussaakkajunneri:

”Dronningip inuunini tamaat Nunatsinnut asanninnermik angisuumik takutitsisarpoq, aamma naalagaaffimmi nunat avannarlersaat tikeraaraangagu tulluusimaarneq nuannaarnerlu takutittagaa malugijuartarparput. Tamanna maani najuuttorpassuarnit pingaartinneqartarpoq, qularutiginngilaralu tamanna pillugu kunngikkormiut Nunatsinni taama nuannarineqartigisartut – uagut kiisalu kalaallit kulturerput pinngortitarpullu immikkuullarilluinnartumik nuannarigaatigut malugisarparput. Dronningip nuannarinninnera angingaarmat allaat eqqumiitsuliaatigut kusanartumik takuneqarsinnaalluni. Tamannalu ukioq kingulleq Katuami saqqummersitsinikkut ilaatigut misigaarput, tassanilu Dronningip suliai kalaalerpaluttut saqqummersinneqarput pinngortitarlu tamatta asaqisarput kusanartumik takutillugu.”

Oqalugiaat qulingiluariarluni hurraartuutigaluni dronningimik inuummersoqqusinermik naggaserneqarpoq, pinngitsoorani Københavnimi tusaaneqarsinnaasumik.

Pisumi assit ataani takukkit.