Innuttaasunut

Angajoqqaarsianut uagutsinnut tatiginninnermik nalunaarut kusanartoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kathrine aamma Marius Fly Camillamut maannakkut qulingiluanik ukiulimmut 2014-imiit angajoqqaarsiaapput

– Camilla pigileratsigu qutsatissaraarput. Tunissutisiatta annersaasa ilagaat. Pilluartittaqaatigut. Angajoqqaavi angajoqqaatut akisussaanerup tunniunnerani tatiginninnerujussuarmik takutitsinerannik qutsavigerusuppavut.

Ilaqutariit Fly ukiuni kingullerni pingasuni Camillamut suli angajoqqaarsiaapput. Angajoqqaarsiat tassaasinnaapput ilaqutariit meeqqamik ulloq unnuarlu tigumminnittut tassaasinnaallutilluunniit ilaqutariit oqilisaasartut, meeraq nammineq ilaquttamini najugaqartoq qaammammullu ulluni aalajangersimasumik amerlassusilinni ilaqutariinni oqilisaasuniittarluni.

Kommuneqarfik Sermersuumi ilaqutariit oqilisaasartut arlaliupput, annertuumik nersorneqartarialimmillu suliaqarput, taakkunani meeqqat toqqissisimasumik patajaatsumillu ulluinnarni inuuneqartinneqartarlutik.

– Camillamut angajoqqaatut oqartussaassuseqalersimanerput ugguarinngisaannarparput. Angajoqqaaviisa qanimut suleqatiginissaat uagutsinnut pingaartuuvoq. Ilaquttaminut atassuteqarluarpoq tapersersoqatigiittarpugullu, taamaalilluta meeraq pitsaanerpaamik tunngavissaqartinniassagatsigu.

Kathrine aamma Marius ukiut 20-t sinnerlugit maannamut ilisimasariipput pingasunillu inersimasunik meeraqarlutik. Angajulliit marluk qangali nammineq ineqalernikuupput nukarlerlu ilinniarnertuunngorniarfimmi atuarnermini angajoqqaamini suli najugaqarpoq.

– Eqqarsaataanikuugaluarpoq meeqqat namminneq ineqalereermata utoqqaanerput nuannisaarfigissallutigu nunarsuarmilu assigiinngitsunut angalasalissalluta. Camillali takummat piviusunngunngilaq. Allamik naleqarnerujussuarmik tunisarpaatigut.

Ilaqutariit angajoqqaarsianngornerat nalaatsornerinnarmik pivoq.

– Tusarnikuuarput aqqaluara paneqartoq niviarsiararli takunngisaannarlutigu. Aatsaat kaffisoriaqqusaagatta takuarput. Camilla ulloq taanna marluliivoq, Kathrine Fly oqaluttuarpoq.

Kaffisoriareernerup kinguninngua Camilla Kathrinemi Mariusumilu tukkusalerpoq.

– Atsassuarmik taasalerpaanga uigalu ningaamik taasarlugu. Camilla tamassuma kinguninngua uagutsinni tukkusalerpoq. Siullermik sapaatit akunnerisa naanerini, kingusinnerusukkullu ulluinnarni aamma tukkusalerpoq. Malugerpiarnagu siniffissaanik, pinnguassaanik atisassaanillu pisissupparput.

– Piffissat ilaanni Ilulissanut feriarpugut, sapaatillu akunneri marluk qaangiuttut Nuummut uteratta Camilla anaanaalu Brugensenip eqqaani naapippavut. Suaarpoq ”atsassuaq” arpaannarlu ornilluta. Maqaasisimavaatigut qissaserlunilu. Uummatikkut attorteqaanga, Kathrine Fly oqarpoq.

– Meerarsiartaarluni pilluarnangaarpoq. Camilla pitsaasunik angajoqqaaqarpoq nunarsuarmilu asanerpaallugu, inuttulli pissutsit pissutigalugit paarinissaanut nukissaqanngillat. Tassani ilannguppugut.

– Camilla pitsaanerpaamik peroriartornissaa uagutsinnut angajoqqaaviinullu pingaartuuvoq. Piffissani aalajangersimasuni innartarpoq ullaakkullu siusissukkut itersarneqartarluni, taamaalilluni qasuersimalluni atuariartortarpoq.

– Camillap ilaqutariinnut ilanngutitinnera uagutsinnut ajornanngitsunnguusimavoq. Tamanit annertuumik tapersersorneqarpugut, pingaartumik Camillap anaanaanit. Uummateqartorujussuuvoq tapersersuijuaannartuullunilu sulilu inuunitta ilarujussuaraa.

Tapersersoqatigiittarpugut

– Soorunami allap meeraanik akisussaaffeqalerneq inuunermik allannguisorujussuuvoq, ilikkagaqarfiulluarlunili.

– Oqaloqatigiilluarsinnaanerput aappariittut nukittorsaatigaarput, aamma mianernarsinnaasut pillugit. Soorunami angerlarsimaffitsinni aamma akerleriittoqartaraluarpoq, immitsinnulli inissaqartittuaannarpugut ajornartorsiutaalersullu aaqqissinnaallutigit. Assersuutigalugu akerleriissutit aaqqeqqaartinnagit innanngisaannarpugut.

– Aamma ataqqeqatigiinnitta takutinnissaa pikkoriffigaarput immitsinnullu asanninnermik takutitsisarluta. Uagutsinni pakkuttoqartartorujussuuvoq. Aappariittut assigiinngitsuuvugut, malitatsinnilli naleqartitaqarpugut. Ikioqatigiinnissaq inissaqartitsinissarlu pikkoriffigaarput.

– Kialluunniit matuni allanut ammarsinnaavaa, angerlarsimaffiilli tamarmiunngitsut kialaartumik pissusilersorfiusarput. Meeqqap paarisap piffissaqarfiginissaa aammali angajoqqaaviinik suleqateqarluarnissaq angajoqqaarsiatut pingaartorujussuuvoq.

Angajoqqaarsiaanissat kissaatigisinnaaviuk?

PAASISSUTISSAT SUKUMIINERUSUT: Tlf 36 72 07 /36 72 08 / 36 72 09

NAMMINEQ TAKKULLUNI:

Meeqqanut Ilaqutariinnullu Ingerlatsivik

Imaneq 20, 3900 Nuuk

Ataasinngornermiit pingasunngornermut nal. 10-15

Sisamanngorneq kl 12-17

Tallimanngorneq kl 10-12