Tasiilami apersuarnera ulapisitsivoq

Kommuneqarfik Sermersuup Tasiilami aputaajaaneq sulissutigaa.

Ullut kingulliit marluk ingerlanerini Tasiilami meterit marluk angullugit apisimavoq. Aputip taamak annertutigisoq ataatsikkut takkunnera Kommuneqarfik Sermersuumut unamminartortaqarpoq.

”Sulisugut ulloq unnuarlu sulipput illoqarfimmilu atortorissaarutit pissarsiarisinnaasagut attartorsimavagut. Taamaakkaluartorli sivikinnerpaamik sapaatip akunnera ataaseq atorlugu aput piiarniarsarissavarput. Apisimanera tamatumani annertuallaarsimavoq”, Kommuneqarfik Sermersuumi ingerlatsinermi pisortaq Frank Rasmussen oqarpoq.

Marlunngornerup ullaavani Tasiilami suli annertuumik apivoq, tamatumalu soorunami aputaajaaneq kinguarsarpaa.

Kommuneqarfik Sermersooq upalungaarsimasussanik pilersitsisimavoq. Pinartumik angerlarsimaffik qimattariaqaraanni, assersuutigalugu napparsimaviliarniarluni, upalungaarsimasut pisortaata tullia Hendrik Andreassen attavigineqassaaq, oqarasuaat: 598195.