Innuttaasunut

Meeqqanut Ilaqutariinnullu Ataatsimiititaq: Norgemut Danmarkimullu paasisassarsiorluni angalaneq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Meeqqanut Ilaqutariinnullu Ataatsimiititaq marsip qaammataata aallartinnerani Tromsømut Københavnimullu angalapput.

Nunani avannarlerni nunat marluusut tikeraarnerini kattuffiit, kommunit, sullissisut innuttaasunullu neqeroorutaasartut ataatsimiititamit paasisassarsiorfigineqarput.

Tromsø Kalaallit Nunaanut nunatatigut assingummat paasisassarsiorfissatut toqqarneqarpoq, aamma Norge isumaginninnermi sulinerup iluani siuttuusutut inissisimammat.

Norgemi illoqarfimmi Ilaqutariit Illuat politikerinit alakkarneqarpoq. Ilaqutariit Illuanni meeqqanut inuusuttunullu taakkulu ilaqutaannut ikiorsiinerit katersuunneqartarput. Illumi ilaqutariinnut naalungiarsuutilinnut siusissukkut iliuuseqarnissamut neqeroorutini meeqqerisut, angajoqqaanik siunnersuisut meeqqeriviillu sumiiffimmi ataatsimoortinneqarput. Meeqqat inuusuttullu taakkulu ilaqutaasa ingerlalluarnerat peqqinnerallu siuarsarniarlugit kiisalu meeqqat inuusuttullu pitsaasumik peroriartortinniarlugit siunertaralugu atugaannik nukittorsaaniarluni taamatut ataatsimoortinneqarput.

”Ingerlatsivitsinni qanoq maannamiit ineriartortitsinissatsinnut Tromsømut tikeraarnitsinni suliniutit paasisaqarnarput. Kommuneqarfik Sermersuumi meeqqanut inuusuttunullu iluaqutaasussanik aaqqissuussaanerput pitsaanerpaamik qanoq inerisarsinnaanerlugu paasisassarsiorfigilluarparput. Neqeroorutit sumiiffimmi ataatsimi ataatsimoorunneranut isuma pitsaasuuvoq. Meeqqat inuusuttullu peqqinnerannut, ineriartornerannut pisariaqartitaannullu sanilliullugu paasisat suliniutillu ataqatigiilluarput. Ilaqutariit meerartallit allatigut ikiorneqarnissaminnut pisariaqartitsippata, sulisut malinnaareersut eqqortunillu piginnaasallit pitsaanerpaamik ikiuunnissaminnut nalileeriaannaapput,” taama oqarpoq Uju Petersen (IA), Meeqqanut Ilaqutariinnullu Ataatsimiititami siulitaasoq.

Københavnimi ilaatigut sammisassaqartitsisarfik Sundholm, Kalaallit Illuat aamma Døgnvagten politikerinit pulaarneqarput. Døgnvagten Københavnip Kommuniani meeqqanut, inuusuttunut inersimasunullu inuttut ajornartorsiuteqartunut pilertortumik ikiorneqartariaqartunut ikiuisarfiuvoq. Nalinginnaasumik ammasarfiup avataatigut Døgnvagten ammasarpoq.

”Døgnvagten-imiinnitsinni pitsaasumik oqaloqatigiillutalu isumassarsianik paarlaasseqatigiippugut. Isumaginnittoqarfimmi pigaartoqarnitta suliareqqinnera aamma meeqqat inuusuttullu pillugit nalunaarutaannarnik suliaqartussat eqqarsaatigalugit toqqammavissatsinnik pitsaasumik takutitsivoq. Angalanerput tamaat isigalugu pissarsiaqarluarnarpoq,” taama oqarpoq Uju Petersen.