Meeqqanik inuusuttunillu sullissineq annertusineqartoq

Iliuuseqartarnerup assigiissaarneqarnissaa sukkanerusumillu iliuuseqartarnissaq qulakkeerniarneqarput.

– Isumalluarpunga, Meeqqanut Ilaqutariinnullu Ingerlatsivimmi pisortaq Martha Lund Olsen oqarpoq.

Kommuneqarfik Sermersuup sumiginnaanermut atugarliornermullu tunngasunik nalunaarutit suliarineqarnissaannut atortorissaarut periusissarlu nutaaq atulerpaa. Taamaaliornikkut meeqqanik inuusuttunillu inuuniarnermikkut ajornartorsiuteqartunut atatillugu sulianik suliaqarneq sukkanerujussuanngorlunilu isumannaannerulissaaq.

– Meeqqat tapersersorneqarnissaannut inatsit tassaavoq sumiginnagaanermut atugarliornermulluunniit pasitsaassinerit ajornannginnerusumik tunniunneqartalernissaannut iliuuseqarnitsinnut pissutaasoq, tassa nalunaarutinut saaffiginnissutit assigiiaartumik suliarineqarnissaat isumagigatsigu. Meeqqavut inuusuttortavullu toqqissisimasumik isumannaatsumillu alliartornissaat kommunitut, angajoqqaat inuiaqatigiillu peqatigalugit, annertuumik akisussaaffigaarput. Periuseq nutaaq atorlugu siunissami meeqqat inuusuttullu inuunerminni aallartinnerliornissaannut navianartorsiortut ikiorniarlugit iliuuseqartarnerput pitsanngorsaavigineqassaq, Martha Lund Olsen oqarpoq.

Kommuneqarfik Sermersooq ilaatigut Nuummi immikkut ittumik Nalunaaruteqartarnermi sulisunik piareersimasunik pilersitsisimapput.

– Tassa imaappoq, innuttaasut sulisullu ataatsimik saaffiginnittarfeqalerput. Siornatigut nalunaarutit assigiinngitsorpassuartigut kommunimilu sulisunut assigiinngitsorpassuarnut tunniunneqartarsimapput, tamannalu pitsaanerpaasimanngilaq, Martha Lund Olsen oqarpoq.

Pisassaqarfiit tamarmik meeqqanik inuusuttunillu sullissisut ataatsimiinnermut qaaqquneqarsimapput Kommuneqarfik Sermersuullu iliuusai nutaat pillugit ilisimatinneqarsimallutik.

– Sumiginnaanermik pasitsaassaqaraanni ingerlaannaq kommunimut nalunaarutigineqassaaq. Nalunaarutit tamarmik akunnerit 24-it ingerlaneranni naliliiffigineqartassapput.

– Naliliinermi siullermi kommune piaartumik iliuuseqassanersoq nalilerneqassaaq immaqaluunniit misissueqqittoqassanersoq naliliiffigineqassalluni, Martha Lund Olsen oqarpoq.

Kommuneqarfik Sermersooq innuttaasunut suliamillu ilisimasalinnut, meeqqamik inuusuttumilluunniit ernumassuteqartunut, kommunimullu nalunaaruteqarniarlutik kissaateqartunut, internetikkut nittartagaq portali nutaaq pilersippaat. Una toorlugu takuneqarsinnaavoq: Meeqqamik eqqasuuteqarpit?