Piorsaavimmi ilinniartut filmiliornermut pikkorissarneri

Tasiilami Inuusuttut Kulturikkut Illuat, KNR-ip inuusuttunut aallakaatitassiortui peqatigalugit filmilioriaatsinik, filmilianillu allanngortiterineq killuinerlu pillugit ilinniartinneqaqqammerput.

Inuusuttut Kulturikkut Illuat suliamut, sapaatip akunnerani 7-mi ulluni tallimani ingerlanneqartumut aaqqissuisuullunilu qaaqqusivoq.

Suliami suleqatigiissinneqarput inuusuttut Piorsaavimmeersut.

Suliaq Inuusuttut Kulturikkut Illuata aallartippaa, neriullutik projektimut atajuartussamut aallarniutaasoq. Pilersaarutaavormi siunissami inuusuttut nammineerlutik suliaq ingerlattarumaaraat.

– Inuusuttut Kulturikkut Illuat suli sananeqanngikkaluartoq uannut pingaaruteqarpoq illoqanngikkaluarluta suliamik aallartisaasinnaanissarput. Suliaq illu ammarsimalereeriarpat suli ingerlasinnaasoq, taamanikkussamullu inuusuttut namminneq ingerlassinnaasaat, Mia Skifte Lynge, Inuusuttut Kulturikkut Illuanni aqutsisoq oqaluttuarpoq.

KNR-ip inuusuttunut aallakaatitassiortui pingasut Tasiilamut ilinniartitsiartorput.

Teknikerip Aannguaq Reimer Mathiassen-p nipi, assitarisat filmilioriutsillu ilisaritippai.

– Uannut pingaaruteqarpoq nipi assitallu ilisimassagaat; taavalu filmilioriaatsit atorneri isiginnaartumut qanoq sunniuteqarsinnaanersut.

Inuusuttut aamma isumassarsiornermut, isumassarsiat katersornissaannut isumassarsiallu ilusilersornissaannut ilinniartinneqarput. Tassa imaappoq inuusuttut ilinniarpaat isumassarsiat katersorneri, oqaluttualiorneq, filmiliassallu piareersarnera qanoq pingaaruteqartiginersoq.

Paasissutissat taakkua tunniunneqareersut, inuusuttut eqimattanut marlunnut avinneqarput, eqimattallu piumaffigineqarput immikkut isumassarsiorlutik filmiliassaminnik piareersaassasut. Aqaguani piareersagassat tamakkeriarlugit anipput filmilioriartorlutik.

Suliakkiissutigineqartunut inuusuttut aalariapallattupilussuusarput piumassuseqangaatsiarlutik, ilinniartikkuminaqalutillu. Sapaatip akunnerata ingerlanerani illoqarfimmik ilisarititsinissaq aamma sammivaat, tassani filmiliorlutik illoqarfitsik imminnullu ilisaritinnissartik sammillugu. Sapaatip akunnerata naanerani eqimattat marluk immikkut filmiliaaqqamik ersinartuliamik takutitsipput, saniatigullu imminnut Tasiilamilu inuusuttuunermut tunngasunik filmiliaaqqanik takutitsillutik.

Suliap saniatigut inuusuttut KNR-ip inuusuttunut aallakaatitassiortuisa Senior Wow Wow-mik suliaqarnerat malinnaavigivaat. Fjernsynimut raatiumullu aallakaatitassiortut malinnaavigaat, inuusuttullumi aamma raatiumi toqqaannartumik apersorneqarput. Taamaalillutik KNR-ip inuusuttunut aallakaatitassiortui qanoq suleriuseqarnersut takuaat.

KNR-ip Inuusuttunut Kulturikkut Illuatalu pingaartippaat sapaatip akunnerata taassuma iluani ilikkarneqartut aalluttuartarnissaat. Taamaammat suliap ingerlateqqinnissaanut suliniutit ingerlaarput. Inuusuttut Kulturikkut Illuata suliamut siunertaraa inuusuttut Tasiilamiittut Kalaallit Nunaanni inuusuttoqatiminnut aallakaatitassiortarnissaat, KNR-kkut aallakaatittagassanik.

– Siunertaraarput Tasiilami inuusuttut piumasut kikkulluunniit isumassarsiornermi, pilersaarusiornermi filmiliornermilu peqataatittarnissaat, massakkulli suli suliaq aallartisaruttulerparput, taamaammat arriitsumik siumut sulerujoorallassaagut Piorsaavimmi suleqatigisagut peqatigalutigit. Taamaalioriarluta soorunami sulissutigiumaarparput filmiliornermut sammisaqartut amerlisarnissaat, illoqarfimmilu inuusuttunut siaruarnissaa. Taamaakkaluartoq inuusuttut filmiliornermut soqutigisallit Inuusuttut Kulturikkut Illuannut saaffiginnissinnaalereerput, Mia Skifte Lynge oqarpoq.