Innuttaasunut

Asiip aalisartut naapisimaarai

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Sap. ak siuliani borgmester Asii Chemnitz Narup Paamiuni aalisartut piniartullu peqatigiiffiat PAPP naapisimaarpai

– Oqaloqatigiinnerput nuannersumik ingerlavoq. Ilaatigut neqitsersuisarfik alakkarpara takullugulu suut unammillernartutut taaneqarsinnaanersut. Uannut pingaaruteqarpoq innuttaasunik qanimut oqaloqateqartarsinnaaneq. Aalisartut piniartullu siornatigut naapisimaareernikuuvakka oqaloqatigiinnerpullu kingulleq tassaasoq nangitsineq. Uannut pingaaruteqarpoq paasitissallugu aalisartut piniartullu tusarnaaratsigit, pingaartikkatsigit politikkikkullu iluarsiinissamut tapersersoratsigit.

– Projektleder Frederik Grønvold angalaqatigivarput. Taanna aalisartunut piniartunullu qanimut suleqateqarsimavoq annertuumillu suliaqarsimalluni aalisartunut piniartunullu pitsanngorsaanissamut.Paamiuni aalisartut piniartullu 40-t missaannik ilaasortaqarput.

Peqatigiiffimmi siulittaasoq, Niels Lorentzen ataatsimiinnermi peqataavoq siulersuisoqatini, Peter Aage Petersen, Tittooraq Petersen aamma Hermann Hegelund peqatigalugit.

– Ataatsimiinnerput nuannersumik ingerlanneqarpoq. Misigisimavugut pingaartinneqarluta kommuniminngaanniillu tusaajumaneqarluta ajornartorsiutigullu aaqqiivigineqarusuttut. Illunnguaqarpugut atorluakkatsinnik, iluarsisassaqarporli. Illunnguarput neqitsersuisarfittut atorparput kisianni aamma amminik tigooraavinngornissaa kissaatigaarput, kisianni tamanna piviusunngorsinnaanngilaq tamaanimi imeqannginnami. Siunissali qanittoq isigissagaanni qujanartumik pissutsit tamakkua iluarsaaffigineqalerput, Niels Lorentzen oqarpoq.