Priscilla Josefsenip nalliuttorsiutigineqarnera

Tallimanngorneq februaarip ulluisa 15-ianni Nuutoqaq aaqqissuussamut immikkut ittumut qaaqqusisuuvoq. Ullormi tassani Priscilla Josefsen borgmesteri Asii Chemnitz Narupimit, Kittammit kiisalu ilaquttanit ikinngutinillu nalliuttorsiutigineqarpoq.

Priscilla Josefsen inuuissiorluni 90-inik ukioqalertoq Nuummi arnat malunnaateqarluartut ilagaat. Inuunermini inoqatimi siuarsartuarnissaannut sivisoqisumik sullissisarsimavoq.

Benigne Rasmussen peqatigalugu 1982-imi mersortarfik Kittat aallartippaa. Taamanikkut arnat suliffissaaleqisut amerlavallaartut aallartitsinerminni Priscilla isumaqarsimavoq, ajornartorsiutillu aaqqiiviginissaanut akisussaasutut misigisimalluni. Aammattaaq assassorneq arnanut inuusunnerusunut ilikkartinnissaa pisussaaffittut isigisimallugu, taamaalillutik ileqquusumik assassorneq naqqaniit ilinniarsimavaat. Kittani assassorneq aallutarilluarneqarpoq, pingaartumillu avittat suliarineqartarlutik.

Nuup Kommuneata mersortarfik 1990-imi akisussaaffigilerpaa. Tamatuma kingorna suliffissaqartitsinikkut neqeroorutaasinnarluni kulturimut attuumassuteqartumik suliffeqartittut inissisimalerpoq.

Priscillap tunniussarpassuarisimasai pillugit qujaffiginiarneqarnerani borgmesterimit tunissummik tunisippoq, kiisalu kukkilinnik immikkuullarilluinnartunik Kittani aqutsisuugallartumit, Sara Marie Lyberthimit tunisilluni.

Aammattaaq Priscilla Kulturikkut kingornussatta attattuarnissaannik suliniuteqarsimanera pillugu Namminersornerullutik Oqartussanit 2008-mi kulturikkut nersornaataannik tunineqarpoq.