Kommunimut pilersaarummut tapiliussaq: Nuummi antenneqarfiup nutaap nunarsuaq pituttussavaa

Antenneqarfiup sananeqarneratigut, Nuuk nunarsuarmi satelittikkut internetimik sukkasuuliamik pilersuisunut ilaasissaaq.

Antenneqarfik nunarsuarmut – sumiiffinnut inoqanngitsunut ilanngulllu, internetimik akikittumik pilersuisuusoq siunissami Nuummiilissaaq. Tamanna piviusuulersinnaavoq, kommunimut pilersaarummut tapiliussap tusarniutigineqarnissaanut Kommunalbestyrelsemiit maanna akuerineqareertorlu.

Antenneqarfik, nunarsuaq tamaat antenneqarfiit 30-it missaanniittut ilagissavaat.

Nunarsuup avannaani nunap qaammataasiallu akornini nassitsissutinik tigooraanissamut Nuuk inissisimalluarpoq. Nuummilu søkabeleqarnerata antenneqarfiup internetimut sukkasuuliamut attavilerneqarsinnaanera periarfissippaa.

Malene Lynge (IA), Kommuneqarfik Sermersuumi Sanarfinermut Avatangiisinullu Ataatsimiititami siulittaasoq suliniummut Nuummut nittarsaataasinnaasumut qilanaarpoq:

”Nuummut iluanaarutaassaaq pingaarnersatullu illoqarfigisatta avammut nittarsaanneranut tapertaajumaarluni. Suliffeqarfissuit nunanit allaneersut, attaveqaateqarnerup iluani suliamik taamak siuarsimatigisumik Nuuk sanaartorfigissallugu qinersimammassuk persuarsiutissaavoq.”

Suliffeqarfissuit internetikimik qaammataasakkoortumik suliaqartut nunanit tamaaleersut tassaapput Nuummik soqutiginnilersimasut. TELE-POST attaveqaatinik pioreersunik isumaginnittoralugu akisussaasoralugulu suliniut ingerlanneqassaaq.

Antenneqarfik Nuummi pinerluuteqarsimasunik inissiisarfiup avannaata tungaani inissinneqassaaq.

“Antenneqarfik pinngortitamut innarliissanngilaq taakanilu nunamik atuisuusunut akornusersuiumaarnani,” Malene Lynge oqarpoq.

Piffissami qaninnermi pilersaarummut siunnersuut sapaatip akunnerini arfinerni tusarniutigineqassaaq.