Tasiilami innuttaasunut ataatsimiititsisoqarnerani inuusuttut, inersimasut utoqqaallu isummersortinneqarput, Kommuneqarfik Sermersuumi qanoq pitsaanerusumik innuttaasunik sullissisoqarsinnaanersoq. Kommuneqarfik Sermersooq aamma konsulenthuset Deloitte suleqatigalugit saqqummiunneqartut nalunaarusiamut ilanngunneqassapput.
Unnukkiartornerani sila taarsivoq, nittaalerlunilu anorlilerpoq, taamaattorli innuttaasut arlallit timersortarfimmut ornigupput. Unnuk innuttaasunut pigitinneqarpoq Kommuneqarfik Sermersoorlu sammineqarluni. Innuttaasut 250-t marlunngornermi ataatsimiinnermut peqataapput.
Innuttaasut eqimattakkuutaanut inissinneqarput, eqimattakkuutaallu tamarmik immikkut sammisaqarput. Tassani ilaatigut eqqartorpaat suna maannakkut ajunngitsumik ingerlanersoq, suna pitsaanerusinnaanersoq, kiap pitsanngorsassaneraa siunissamilu kommunip suna akisussaaffigissaneraa. Kommuneqarfik Sermersuuminngaanniit malinnaasoqarpoq imaqarniliortoqarlunilu.
Ullut kingulliit qulit kommuniminngaanniit Deloittemiillu paasissutissanik katersisoqarpoq, saqqummiunneqartullu nalunaarusiamut ilanngunneqassapput. Kommuneqarfik Sermersuumi Tasiilami allannguutaasinnaasunik nalunaarusiaq imaqassaaq siunnersuuteqartoqassalluni.
Eqimattakkuutaani oqallinneq uummaarissumik ingerlanneqarpoq, suliffeqarneq, ilinniartitaaneq, utoqqaat, inuusuttut, sunngiffinni sammisassat, peqqinneq, meeqqat, ilaqutariit innuttaasunillu kiffartuussineq sammineqarput.
Taassumap siuliani erinarsoqatigiit erinarsorput kingornalu Heidi Jeremiassen Paamiuneersoq suliniut Paamiut Asasara pillugu saqqummiilluni. Suliniut pilersinneqarpoq innuttaasut kissaateqarnerat tunngavigalugu, kommuuni kommunalbestyrelsellu suleqatigalugit.
”Saqqummiussara isumassarsiorfigineqarsinnaavoq. Paamiuni innuttaasut kissaatiginikuuaat atuarfeqarfiup pitsaanerulernissaa, inuussutissarsiornikkut periarfissagissaarnerulernissaq kiisalu ilaqutariit pitsaanerusut. Kissaatigineqartut innuttaasut namminneq pingaartitaralugit saqqummiuppaat, politikerininngaanniinngillat”, Heidi Jeremiassen oqarpoq. Suliniutinik pitsaasunik aamma assersuuteqarpoq, soorlu illoqarfik eqqiluitsoq, kiisalu inuusuttut ineriartortinneqarneri pissutaallutik illoqarfimmi pinerliiniarnerit annikillisinneqarsimasut, nunatsinni illoqarfinnut allanut sanilliussagaanni.
Erinarsoqatigiit unnuk naggaserpaat makitsisoqarluni, tassanilu Tasiilami immikkoortortami ataatsimiititaliaq pinnatassanik tunisisuulluni.