Nasiffimmik aamma Qooqqut Nuannimik piginnittut ininik neriniartarfikumit Nipisamit atorneqarnikunik attartortussanik makitsinermi makitaapput

”Neriniartarfiit tallimat makitsinermi peqataasussat akornanniiginnaraluarpugut, taamaattumik makitsinerup tamakkiisumik naammassineqarnissaata tungaanut makitaanissatsinnut isumalluarpallaarusussimanngilagut. Taamaakkaluartoq soorunami siumut pilersaarusiorpugut, inillu nutartikkat attartornerisigut anguniakkavut ilisimalluinnaqqissaarpagut”, Mads Bek oqarpoq.

Siullermik neriniartarfik Nasiffik Iggiaani umiatsialiviup eqqaaniit Nuutoqqami inini nutartikkanut nuunneqassaaq. Tassani inuit marloriaammik amerlanerusut nerisassanik sassaallerfigisinnaassavaat, neriniartarfittaassallu igaffia sisamariaammik angineruvoq. Tamanna nutaanik periarfissaqalersitsissaaq.

Mads Bek erseqqissaavoq: ”Nipisakumi init angorusutatta angunissaannut naleqquttupilussuupput. Igaffimmi ilinniartuutivut ataatsimik amerlissapput. Taamatuttaaq nerisassat sassaalliutigisartakkatta tamatigoortuunerulernissaannut pilersaaruteqarpugut. Nerisassiassat nunatsinneersut atortakkavut annertuserusuppavut, aamma neriartortullattaartartuvut takornariallumi puigunaatsunik misigisaqarsimallutik neriniartarfimmiit anisarnissaat qulakkeerumallugu ukkatarinerulissavagut. Nerisassianik qularnanngitsumik ooqattaarnikuunngisaannagaannik sassaallerfigisassavagut.”

Qooqquni neriniartarfik init nutartikkat attartornerisigut nutaanik suliniuteqalernissamik isumassarsinermi tunngavioqataasimavoq.

”Qooqqut Nuannimik ingerlatsinitsinni Fish and Dish-imik taallugu najoqqutarisatta neriniartarfiutitaassatsinni atornissaanut akuersissummik tunineqassagutta atulersissavarput. Takornariat taamaalillutik tikikkaangamik aalisagartarisimasatik umiatsiamit nioriutaa siatsikkiartorlugit neriartorlugillu neriniartarfiliaassinngaanngussavaat. Aalisagartaasa sianneqarnerannik isiginnaartiutigalugit soqutiginartorpassurnik soorlu aalisakkereriaatsinut, pinngortitamut Kalaallit Nunaannilu piujuartitsinermik aalisarnermut tunngasunik oqaluttuuttassavagut.”

Mads Bekip Qooqquni neriniartarfiutiminni najoqqutarisartik inini nutartikkani atulerpassuk neriniartarfinnik allanik unammillerteqalertussanngornertik merserinngilaa.

”Qooqquni neriniartarfiutitsinni ukiup qanoq ilinera aallaavigalugu sassaalliutigisartakkavut alutorineqarluarlutik ooqattaarusunneqartuarsinnartarmata Nuummi neriniartarfiutitaatsinni assinganik periuseqarluta ingerlatsinersugut apeqqutaavallaarunarnavianngilaq. Aallartinnissatsinnulli qilanaartupilussuuvugut aamma misiliinerput qanoq kinguneqarumaarnersoq pissanngatigisorujussuuarput!” Mads Bek naggasiivoq.