Meeqqat ulloq unnuarlu angerlarsimaffinni najugallit inersimasunngulernermut ikaarsaarluarsinnaanngussapput

Kommuneqarfik Sermersooq meeqqanut angerlarsimaffiup avataanut inissinneqarsimasunut tapersersorneqarnissamillu pisariaqartitsisunut aningaasaliissuteqarnissamut akuersivoq

- Inuusuttut inersimasutut inuunerminni nammineersinnaalernissaminnut piginnaanngorsartinneqassapput, Meeqqanut Ilaqutariinnullu Ataatsimiititaliami siulittaasoq Uju Petersen oqarpoq.

Kommuneqarfik Sermersuumi kommunalbestyrelse inuusuttunut ininik 15-inik inuusuttunut perorsaanikkut malittareqqitassanut naleqqussakkanik pilersitsiniarpoq.

- Inuusuit initaartinneqassapput aamma aningaasatigut patajaatsumik aqutsinermik, ulluinnarni isumagisassanik soorlu atisanik errorsinermik nerisassiornermillu ilinniartinneqarlutik, sulilernissamik ilinnialernissamilluunniit piginnaanngorsartinneqarlutik ikiorneqassapput. Namminiilernissaannut aamma sulilernissaannut ilinnialernissaannulluunniit tapersernissaat piginnaanngorsarnissaallu pingaaruteqartupilussuuvoq, Uju Petersen oqarpoq.

Inuusuttunut init pilersinneqartussat inuusuttunut ulloq unnuarlu angerlarsimaffimmi najugaqarsimasunut aamma akisussaaffilerneqarnerminni napaniarnerminnilu tapersersorneqarnissamik pisariaqartitsisunut naleqqussagaapput. Inuusuttunut init sisamat maanna atorneqartuaannarput, inuusuttunullu ininik amerlanerusunik pisariaqartitsineq malunnarpoq. Taamaammat kommunep kissaatigisupilussuuaa inuusuttunut ininik nutaanik 18-iniit 23-t angullugit ukiulinnit inigineqartussanik pilersitsisoqassasoq. Inuusuit initaartinneqartut inersimasunngornissaminnut inissinnissaannut ikiorneqassapput, taamaalillunilu ulloq unnuarlu angerlarsimaffimmi najugaqaannarnissaraluat angerlarsimaffeqanngitsunngornissaralualluunniit pinngitsoortinneqassapput.

Meeqqat angerlarsimaffiat Tupaarnaq inuusuit malittareqqinneqarnissaat siunertaralugu pingasunik initaartinneqarpoq.

- Tupaarnaq inuusuttunik arlalinnik 18-iliingajalersunik malittareqqiivigineqarnermillu iluaqutiginnissinnaasunik najugaqartuuteqarpoq. Sullitatta ilai qatangiinnarneqakkajuttartut isumaginissaannut periarfissaqartinneqalernerput qujanartupilussuuvoq. Inuusuttuaqqat sisamat meeqqat angerlarsimaffianni najugallit najugaqatigiiffimmut nuunnissaminnut periarfissaqalissapput, najugaqatigiiffimmilu atassuteqaateqalernissaminnut imminnullu napatinnissaminnut periarfissaqassapput, Uju Petersen oqarpoq.