Ilinniartut nunanit tamalaaneersut Nuuk tikeraaraat

Grækenlandimit Frankrigimillu meeqqat atuarfianni atuartut Erasmus-programmi aqqutigalugu, tassaasoq ilinniarnermut programmi, EU-mi ilinniarfiit akornanni suleqatigiinnermik siuarsaasussaq aqqutigalugu Nuuk tikeraarsimavaat.

Sapaatip akunnera ataaseq Kalaallit Nunaanneereerlutik, tassani katersugaasiviit, oqaluffiit atuarfiillu pulaareerlugit atuartut Nuummiinnertik naggaserlugu kommunip allaffia pulaarpaat.

Tassani ilaatigut kommunalbestyrelsip ataatsimiittarfiani iikkani nivingasut ikaartitikkat pillugit aamma kommune pillugu nalinginnaasumik oqaluttuunneqarput. Atuartut namminneq maanna angalanerminnit misigisimasatik pillugit suliaqartussaammata aamma allattuilllutik Erasmus-nittartagaanut ikkussassanik, attaveqarnermut immikkoortortaqarfimmit siunnersorneqarput. Ilaatigut misigisaminnik allaaserinnilerunik allatamik naatsuutinnissaat aamma qanoq ilillutik paasissutissat pingaarnerpaat eqqaamasinnaaneraat, kiisalu assinik atuisarnerup qanoq pingaaruteqartiginera ilanngullugit siunnersorneqarlutik.   

Misigisarpassuaqarsimapputtaaq: ”Kalaallit Nunaannulli pigatta sorpassuit pissanganartut misilippavut takullugillu, oqaluffiit pisoqqaniit Pinngortitaleriffimmut nutaaliarsuarmut”, oqarpoq Zoe Christaki Grækenlandimeersoq, ”Aamma inuit maani taama aputeqartigisumi sermeqartigisumilu sukkaannarsuaq ingerlasarput, immaqali uagut tamanna sungiusimanngiinnarparput”, Martijn Stienstra Frankrigimeersoq ilanngussivoq.

Tamarmilli isumaqatigiissutigaat Nuuk issittorujussuusoq pitsaasunik inuppassuaqarfiusoq, aamma ataatsimut isigalugu nuannerluinnartumik angalasimanerarlutik. Aris Patakiaras Grækenlandimeersoq Zoemit aamma Martijnimit ilalerneqarpoq misigisimasaminni suna pikkunarnerpaasoq oqaluttuarami: ”Unnuk siulleq maaniilluta qilammi arsarnerit kusanarluinnartut isiginnaaratsigit!”

Arisip aaqqissuussineq programmi nunarsuaq tamaat angalanissamut inunnillu nutaanik naapitsinissamut periarfissatsialaasoq isumaqarpoq, aamma Zoe isumaqarpoq inuunermi misilittakkanik katersiffigissallugu pitsaalluinnartoq, aamma meeqqat kulturinit allaneersut naapinnissaannut periarfissatsialaasoq. Martijn misigisimavoq ”tuluttut pitsaanerulerusulluni. Aamma nunarsuaq angalaarfigalugu nunanik allanik, ileqqunillu allanik  takusaqarnissamut periarfissatsialaasoq.”

Melanie Væggermose Fjordside Erasmus-programmi atorlugu Nuuliartut ilagaat. Oqaluttuarpoq sooq peqataaniarluni nalunaarsimanerluni: ”Pissanganarpalunnermik, aamma ataatama kaammattoraminga. Nammineq assingusumik misilittagaqarsimavoq, ilaqutariinni najugaqaannarluni. Uanga aamma tuluttut pikkorinnerulerusukkama. Aappaagu programmi aqqutigalugu Frankrigiliartussaavugut. Assut pissanganassaqaaq!”

Martijn, Zoe, Aris aamma Melanie.