Kommuneqarfik Sermersooq Kofoeds Skole Nuummiittorlu suleqatiginnissamut isumaqatigiissusiorput, atuarfiup inersimasunut pisariaqartitsisunut ineriartornermut tunngasunik sammisassaqartitsinermik neqerooruteqartarnerat ingerlatiinnarneqarnissaanik qulakkeerinnittumik.
Suliniuteqarfiusoq siulleq ukiuni pingasuni sivisussusilik naammasseqqammerpoq Kommuneqarfik Sermersuullu aningaasaqarnikkut akisussaaffik tiguaa.
– Kofoeds Skole innuttaasunut amerlasuunut kateriffiuvoq. Kofoed Skole atuisuinnaanngitsunit innuttaasuniillu aamma nuannarineqarluarpoq, taamaattumik suleqatigiilluarput ingerlatseqqissinnaanera immikkut ittumik nuannaarutaavoq, borgmesteri Asii Chemnitz Narup oqarpoq.
– Kofoed Skole imminut ikiornissamut ikiunermik tunngaveqarluni ingerlariuseqarpoq. Ukiuni pingasuni ingerlanneqarnerani atuisut innuttaasunit nuannersumik maluginiarneqarput. Tussiaqatigiittartui illoqarfimmiunit ilisimaneqarluarput nuannerineqarluarlutillu qisukunillu atoqqiillutik orpilialiaat nuannarineqarluarput. Kofoeds Skole ukiuni aggersuni suleqatigeqqinnissaa qilanaaraara, Asii Chemnitz Narup oqarpoq.
Kofoeds skole 2016-imi ammarpoq. Kofoeds Skole innuttaasunut pitsaanerusumik inuuneqarnissamut imminut ikiorumasunut neqeroorutaavoq. Siunnersuinermik, isumagisassanut inuillu akornanniinnissaannik aamma neqerooruteqarpoq. Kofoeds Skolemi atuisut ilinniartitsinermi, assassornermi suliniuteqarnernullu assigiinngitsunut neqerooruterpassuit peqataaffigineqarsinnaapput. Sulilernissamut sungiusartoqarsinnaavortaaq soorlu aamma inuttut ineriartornissamut ikiorneqarnissamut periarfissaqartoq.
Kofoeds Skolemi suliniutinut aqutsisoq, Gudmundur Thorsteinssonip Kommuneqarfik Sermersuup suleqatiginera aamma nuannaarutigeqaa.
– Ukiut pingasut ingerlanerini Kofoeds Skole innuttaasunit tigulluarneqarpoq aaqqissuussaanermullu ilanngulluarsimalluni. Suleqatigiinneq ingerlalluarsimavoq tamannalu ineriartoqqinnissamut aallarniutaalluassaaq.
– Kofoeds Skolemi atuisut sulisullu alloriaqqinnissamut Kommuneqarfik Sermersuullu sulisuisalu suli qanimut suleqatiginerulernissaanut qilanaarput, Gudmundur Thorsteinsson naggasiivoq.