Innuttaasunut

Ilaqutariit imminnut najuinnarnissaannut ikiorneqartut

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kommuneqarfik Sermersooq meeqqat inuusuttullu angerlarsimaffiup avataanut inissinneqarsimasut amerlanerusut ilaquttaminnut angerlarteqqinneqarnissaannut suliaqarnermik annertusaavoq. Tamanna anguniarlugu ilaqutariillu angerlarsimaffiini ikorfartorniarlugit perorsaasunik sisamanik allanik atorfinitsitsisoqarpoq.

– Meeqqat inuusuttullu angerlarsimaffiup avataanut inissinneqarsimasut maannakkorpiaq 200-inik amerlassuseqarpoq. Angerlarsimaffimmi ikorfartorteqartitsisoqarneratigut meeqqat taakku anaanamut ataatamullu angerlarnissaannut periarfissaqalissapput. Tamanna aningaasaliiffigissallugu siunertaqarluarpoq, Meeqqanut Ilaqutariinnullu Ataatsimiititami siulittaasoq Uju Petersen oqarpoq.

Meeqqat taakku 200-t piffissami sivikinnerusumik sivisunerusumiluunniit paaqqinniffinnut ilaqutariinnulluunniit paarsisartunut inissinneqartarput, sapinngisamillu amerlasuut angajoqqaavinut angerlarteqqinneqarnissaat anguniarlugu Kommuneqarfik Sermersooq aappaagumut 800.000 koruuninik aamma meeqqat inuusuttullu ikiortariallit pillugit sulinermut atugassanik ukiunut pingasunut tulliinut 1,2 millioninik aningaasaliivoq.

Nuummi Meeqqanut Ilaqutariinnullu Kiffartuussivik ilaqutariinnik katsorsaanissamik aamma ilaqutariinnut ikorfartorneqartariaqartunut katsorsaanermik siunertaqartumik oqaloqatiginninnermik neqerooruteqarpoq.

– Angajoqqaat amerlasuut qitornatik najoqqilerusullugit inuunerminni allannguiniarlutik ilungersuuteqarput. Imminulli suliarinissamut ilaqutariit suli pisariaqartitsipput, inooriaaserilersimasaminnillu ajornartorsiortitsisumit aniguinissamik pisariaqartitsillutik. Tassuunalu ikiorsinnaagatsigit assut nuannaarutigaara, Uju Petersen oqarpoq.