Innuttaasunut

Ukioq 2018-imi Ilungersuussilluarsimasutut ajugaasut takukkit

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Ukioq manna aamma Borgmesteri Asii Chemnitz Narup nersornaammik innuttaasunut suliniuteqarluarsimasunut aammalu inuiaqatigiinnut immikkut ittumik suliniuteqarsimasunut kajumissaasiivoq

”Ilissinnut qujavunga, maangalu tikilluaritsi ullormut immikkorluinnaq ittuusumut, peqatigiillutami inuiaqatigiinni sullissillaqqissuutivut nalliuttorsiutiginiarpavut.” Taamatut Asii Chemnitz Narupip Ukioq 2018-imi Ilungersuussilluartunut kajumissaasiineq aallartippaa.

Ukiap ingerlanerani kommunimi innuttaasut imminnut innersuussinnaapput, innersuunneqartullu akornanni Aningaasaqarnermut ataatsimiititaliaq ajugaasussamik toqqaasussaavoq. Soorlu ukioq kingulleq pisoq assigalugu aamma ukioq manna ataasiinnaap toqqarneqarnissaa ajornavissimavoq. Taamaattumik ukioq manna ajugaasut pingasuupput, nersornaatit NUIFimmi ilaquttat, ikinngutit ilisarisimasallu akornanni tunniunneqarmata.

Ajugaasoq siulleq

Ukioq manna ilungersuussilluarsimasutut toqqarneqartoq tassaavoq: Aviaq Reimer Olsen, meeraaqqanut inorlutik inunngortunut angajoqqaanut ilaqutaasunullu ikiuutaasinnaasunik nukittungaarluni qasusuillunilu sulissuteqartarsimasoq.

“Asasara Aviaq – siullermik pilluangaarit qujanarlu ilungersuuteqartarninnut. Nalunngilara nammineq inuttut tamakku tamaasa sakkortuumik ilinniarfigisimagitit, aammalu siusinaartumik erninermi misigissutsit assigiinngitsorpassuit qaffakaasut tamaasa misigisimagitit.”

Ajugaasut aappaat

Ukioq manna ilungersuussilluartutut kajumissaaserneqartut aappaat tassaavoq Hr Gymnastik – Nicolaj Graversen, taanna Nuummi meeqqanut inuusuttunullu assut sunniuteqarsimavoq sulilumi sunniuteqarluarluni.

“Asasara Nikolaj – pilluangaarit – qujanarlu Nuummi eqaarsaartartunut pitsaanerusumik atugassaqartitsinissamut tunniusimallutit nuannaarlutillu piumassuseqarluarnernut.”

Ajugaasut pingajuat

Ukioq manna ajugaasut pingajuat tassaavoq peqatigiiffik, Peqatigiiffik Qajaq, kalaallit kulturiannik attassiinnarani aammali meerarpassuarnut, inuusuttunut inersimasunullu amerlaqisunut pingaaruteqarluinnartuusoq.

“Kulturitsinnik qaannamillu eriaginneqataallusi suliniutissinnut tamanullu qajartortartunut suliniutissinnut qujanarujussuaq. Ukioq manna Ilungersuussilluartartunut nersornaat kingulleq ilissinnut tunniussinnaagakku assut tulluusimaarpunga. Peqatigiiffik Qajaq qujangaarluta pattaanniartigu.”

Asii Chemnitz Narupip aamma innersuunneqaraluarlutik ukioq manna kajumissaaserneqanngitsunut qujassuteqarpoq: “Taamaattoqarnera assut kusanarpoq assigiinngitsutigullu uagutsinnut tunissutaalluni, ukiumiillu ukiumut kaumissaaserneqartussatut piukkunneqartut assigiinngissusiisa takutiinnarpaa maani Kommuneqarfik Sermersuumi immitsinnut IKIOQATIGIITTARTUGUT allanillu TAPERSERSUERUSUSSUSEQARTUGUT. Ukiut ingerlaneranni kommunimi pisariaqartinneqaraangata iliuuseqartarnerput nalinginnaalersimavoq – sulinerput aqqutigalugu, nammineq kajumissuserput aallaavigalugu peqatigiiffitsigulluunniit. Immitsinnut ikioqatigiittarpugut immitsinnullu tapersersoqatigiittarluta!

Aaqqissuussinermit assit ataani takuneqarsinnaapput.