Attumi Pinngortitami isumalluutinut siunnersuisoqatigiit Nunat Avannarliit Siunnersuisoqatigiivisa avatangiisit pillugit nersornaatisineranni Kommuneqarfik Sermersuumit pilluaqquagut.

Attumi Pinngortitami isumalluutinut siunnersuisoqatigiit ataasinngornermi Nunat Avannarliit Siunnersuisoqatigiivisa avatangiisit pillugit nersornaammik tunineqarput pissutigalugu Attumi piniartut aalisartullu siunnersuisoqatigiit aqqutigalugit pinngortitamik nakkutilliinerminnik uppernarsaasiorsimammata aammalu ilaatigut ingerlatsinikkut suliniutissatut nutaatut ingerlanneqarsinnaasunik siunnersuuteqarnermikkut ilisimatusarnermilu suliniuterpaalunnut iluaqusersuisimammata.

Aappassaa Kalaallit Nunaat, Nunat Avannarliit Siunnersuisoqatigiivisa Avatangiisit pillugit Nersornaatisivoq aammalu tamanna Attormiunit Nuummiunisulli nuannaarutigineqaqisumik sumiiffimmi paasisimasat ilisimatuussutsikkullu siunnerfilimmik suleqatigiinnikkut pilluni.

”Aalisartut piniartullu aamma biologit akornanni taama angusaqarluarusussuseqartumik suleqatigiinnerat takullugu assorujussuaq nuannerpoq, nunarput taamaattoq tulluusimaarnarpoq. Tamatuma takutippaa nutaaliornikkut suliniutinik ineriartortitsinissamut periarfissaqartugut, taakkulu silarsuup sinneranit ilinniarfigineqarsinnaapput”, taama oqarpoq Kommuneqarfik Sermersuumi borgmesteri, Asii Chemnitz Narup. 

Nersornaatisinermi kajumissaarutitut takuneqarsinnaavoq, Attumi misilittakkanit Finlandimi Ruslandimilu assingusunik suliniuteqarnikkut isumassarsisimasut.

”Nunatsinnit misilittakkat piujuartitsinerlu nunani allani aqutsinikkut pitsaanerulersitsinissamut atorluarneqartut takullugit assut nuannerpoq. Neriuppunga kommunerisanni aalisartut piniartullu isumassarsiaq atorlualerumaaraat”, Asii Chemnitz Narup oqarpoq.  

Pissusiviusut:

Ullumikkut Pinngortitami isumalluutinut siunnersuisoqatigiit tallimaapput

Attumi Pinngortitami isumalluutinut siunnersuisoqatigiit 2014-imi pilersinneqarput, taakkuuppullu Kalaallit Nunaanni siunnersuisoqatigiinni tallimaasuni assingusuni ingerlalluarnerpaasut. Siunnersuisoqatigiit pisortani PISUNA aqqutigalugu ingerlapput, taannalu 2009-mi pilersinneqarpoq.. PISUNA aqqutigalugu uppernarsaasiornikkut innuttaasut peqataatinneqarnerunissaat aamma avatangiisit pillugit aqutsinissaq aamma ajornaatsumik nutaaliortumillu pisuussutsit uumassusillit ersarissarneqarnissaannik siunertaqarpoq.

Imaani avatangiisit pillugit ilisimasat innuttaasunik tamat oqartussaaqataanerannik peqataatitsinikkut, aqutsinerup nukittorsarneratigut aamma najukkani innuttaasut akisussaaffiinik avatangiisinik pinngortitamillu piginnittuunerannik PISUNA aqqutigalugu Pinngortitami isumalluutinut siunnersuisoqatigiit suliaqartarput.

Pinngortitami isumalluutinut siunnersuisoqatigiit ataatsimuussusermik pilersitsisuupput, taakkulu aqqutigalugit innuttaasut, ilisimatuut aqutsiveqarfiillu akornanni suleqatigiinneq siuarsarneqartarpoq. Taamatut suliniuteqarnikkut Finlandimi aamma Ruslandimi isumassarsiorfigineqalereerpoq nunanullu amerlanerusunut aamma nunani issittuni avataanilu imaani nunamilu suliffeqarfissuarnut siammarternerusinnaalluni, ilaatigut pinngortitaq avatangiisillu eqqarsaatigalugit.

*PISUNA naalisagaavoq isumaqarluni Piniakkanik sumiiffinni nalunaarsuineq.