Tasiilami kukkukuusivimmik pilersitsisoqassava?

Tassaavoq suliffeqarfinnik sulilernissamut piareersarfinnik pilersitsisoqarnissaa pillugu workshoppertoqarnerani apeqqutigineqartut ilaat.

Suliffeqarfiit sulilernissamut piareersarfiit suliffeqarfiupput allaanerusut, assersuutigalugu innuttaasunik ikiortarialinnik peqataatitsilluni sulisoqarfiusut. Suliffeqarfik sulilernissamut piareersarfik inunnik ilungersuussilluartunit aallarnisaasunillu pilersinneqartarpoq inuuniarnermut imaluunniit inuiaqatigiit akornanni ajornartorsiummik takunnissinnaasunik.

Kommuneqarfik Sermersooq juulimi pingaartumik kommunimi inuusuttunut suliffissaaleqisunut suliffeqarfinnik sulilernissamut piareersarfiusunik pilersitsinissaq pillugu qallunaat suliffeqarfiannik Grennessminde aamma Advokatkontoret atsioqatigiissuteqarput. Taavalu qanittukkut Tasiilaq tikinneqarpoq tassanilu suliffeqarfiit workshoppernissamut qaaqquneqarput. Tassani peqataasut suliffeqarfinnik sulilernissamut piareersarfinnik pilersitsinissamut tunngatillugu isumassarsianik avitseqatigiillutillu siunnersuuteqartuupput.

- Inuit inussiarnersorujussuupput ilassilluarneqaqaagullu, aammalu isumassarsianik angerlaassaqarpugut suliareqqitassatsinnik, aaqqissuussisut unnersiorput.

Kommuneqarfik Sermersooq, Grennesminde aammalu Advokatkontoret Tasiilami workshoppertitsinermik ingerlatsisuupput.-Isumassarsiarineqartut ilagivaat kukkukuuteqalernissaq, cafeet amerlanerusut, innuttaasunut iggassisarfik, ataatsimoorluni nereqatigiiffiusinnaasoq, anaananut inuusuttunut tunngasunik suliniuteqarneq, kusanartuliornermut tunngasunik suliniuteqarneq aammalu kalaalimineerniarfimmik pilersitsineq, nammineq pisanik nunaqqatinut takornarianullu tuniniaaffiusinnaasumik, advokat Knud Folschack oqarpoq.

- Isumassarsiat saqqummiunneqartut angerlaallugit misissoqqissaassavagut. Imaassinnaavoq isumassarsiat ilaat atunngitsoorneqartut, ilaalli piviusunngortinneqarlutik.

Siunertarineqarpoq suliffeqarfimmik ingerlalluarsinnaasumik ukiorpassuarnilu suliffiusinnaasumik pilersitsisoqarnissaa. Suliffeqarfik tamakkerlugu aningaasaliisussarsiorneq tunngavigalugu suliarineqassaaq.

- Tamanna iluatsissappat pingaartorujussuuvoq, najukkami innuttaasut tapersersuilluarnissaat Knud Folschack oqarpoq.

Suliffeqarfik sulilernissamut piareersarfik nutaajuvoq suliffeqarfimmillu ingerlatseriaasiulluni allaanerusoq. Nammineq kajumissutsimik sulinikkut nioqqutissanik tuniniaanermit aamma pisortani, suliffeqarfinni allani, atuisunit namminersortuniluunniit soorlu allaanerusoq.

Inuusuttut arfinillit Danmarkiliassapput

Qaammatini aggersuni tulliuttuni inuusuttut arfinillit toqqarneqassapput sivisuumik Grennessmindemiittussat. Grennessminde ukiorpassuarni misilittagaqarpoq inuusuttut immikkut pisariaqartitsisut sullinnerini, aammalu ilinniarnissamut suliffeqalernissamut inissanillu assigiinngitsunik neqerooruteqartartuupput.

- Inuusuttunik arfinilinnik Tasiilami Majoriaq suleqatigalugu toqqaassaagut. Inuusuttut taakkua piffissami aalajangersimasumi Danmarkimiissapput sulillutillu. Naatsorsuutigaarput inuusuttut ukiortaap kingorna aallartissinnaassasut, semesteri nutaaq aallartippat. Danmarkimeereerunik Tasiilamut utissapput nittarsaassisartutullu sulissallutik, Hanne Danielsen, Grennessmindemi pisortaq oqarpoq.