Eqqumiitsuliortut avitseqatigiittut

Gedion Qeqe Tasiilameersoq, Kommuneqarfik Sermersuumi kulturikkut nittarsaassisoq Nuummeeqqammerpoq, tassanilu oqalugiarlunilu sammisassaqartitsivoq.

Tallimanngornermi ualikkut eqqumiitsuliortut sanaluttarfiani Ajagami saqqummersitsisoqarpoq. Atuisut 20-30-t akornanniipput eqqumiitsuliortullu arlallit saqqummersitsinermut peqataapput.

67-nik ukiulik Gedion Qeqe ukioq manna kulturikkut nittarsaassisutut toqqarneqarpoq. Kuummiormiuuvoq kingornalu Tasiilamut nuussimalluni. Ukiorpassuarni aalisartuusimavoq. 80-kut naajartorneranni kilisaammi sulitilluni silarlussiortillutik qitini ajoquserpaa.

- Ajoraluartumik umiartortutut unittariaqarsimavunga allamillu suliffissarsiorlunga. Taamanikkut 38-nik ukioqarpunga taamanikkullu akueriuminaatsissimavara suliunnaarnissara. Taamaattumik eqqumiitsuliortalerpunga, siulikka malillugit. 

Gedion Qeqep Nuummiinnermini eqqumiitsuliortut allat naapisimaarpai misilittakkaminnillu avitseqatigalugit.

Borgmester Asii Chemnitz Narup saqqummersitsineq alakkarpaa ilaatigullu oqarluni: - Gedion Qeqe kusanarnerpaanik suliaqartarpoq. Piginnaaneqarluarpoq, suliai pitsaasuupput qaffasillutillu immikkuullarissuupput.

Kikkut tamarmik Ajagaq-mi ininik atuisinnaatitaapput. Sanaluttarfimmiittalernissat soqutigigukku Ajakkami immersuiffissaq immersorsinnaavat.