Nuummi Katersortarfimmi OCN-imi piginnaasanik allagartartaartut

Innuttaasut 25-it Open College Network aqqutigalugu uppernarsaateqalerput

Tallimanngorneq oktobarip ulluisa 12-ianni OCN-imik piginnaasaqalernermut uppernarsaatinik, Open College Network, tunniussineq Nuummi katersortarfimmi piviusunngortinneqarpoq. Pikkorissarnermi peqataasut ilaqutaallu nuannaaqisut uppernarsaatinik tunniussinermi kaffillernertalimmik aaqqissuussinermi katersuutsinneqarput.

Sofie Larsen, Nuummeersoq, maanna aappassaa OCN-imik uppernarsaatisivoq. Illup iluani suliassat pillugit pikkorissarpoq. ”Peqataanera iluaqutigeqaara. Imaallaat suliassaqarpunga nuannareqaakkalu. Siorna nerisassiorneq aamma nerisassanik sassaallerneq pillugit pikkorissaqataavunga ukiullu tulliani pikkorissarnermi nutaami peqataarusullunga. Nammineq sulerusuppunga.”

Open College Network periusiuvoq pisortatigoortumik ileqquusumillu ilinniartitaanerup avataatigut piginnaasanik ilikkakkanillu naleqarluartitsisoq. Innuttaasut 25-t tallimanngormat uppernarsaatinik tunineqartut nutaat saniatigut, innuttaasut 80-it annertuumik innarluutillit taamatut naammassinnereerput.

OCN pillugu ilinniarnermut pilersaarut Englandimi 1970-ikkut naajartorneranni pingasunik immikkoortoqarpoq; ilisimasaqarneq, ilisimasat aamma sapinnginneq. Englandimi pikkorissartutut peqataasut OCN-imik pointitik ileqquusumik ilinniartitaanermi ingerlariaqqinnissamut piginnaasatut akueritittarpaat.

”Isumaqarpunga OCN pitsassuusoq. OCN Danmarkimit akuersissuteqarpugut OCN-imillu kakkersakkagut pillugit nersualaarneqarluta. Peqataasut kakkersakkanik aqqutissiuinermut akuerisanik suliaqartarput, taakkulu maani akuerisassanngorlugit ingerlateqqittarpaat tassanngaanniit OCN Danmarkimut akuerisassanngorlugit ingerlateqqinneqartarlutik. Taamaalillutik uppernarsaatit tunniunneqannginnerini pingasoriarlutik akueritittarput. Kakkersakkani suliat pitsaassusaat OCN Danmarkimit assut nersualaarneqarput,” taama oqarpoq Susanne Kærulff Christensen, Kommuneqarfik Sermersuumi Innarluutilinnik Sullissinermi fagchefiusoq.

OCN-imik piginnaasat uppernarsaateqartilerlugit maannakkut pingajussaa kommunimi agguaasoqarpoq. Aqqutissiuussisartut siulliit 2016-imi ilinniagaqarlutik naammassipput siullermillu 2017-imi autisme sapaatip-akunnerani sammineqarneranut atatillugu tunniussineq pivoq. OCN Paamiuni aamma Tasiilami atulersinneqarnissaa ukiuni tulliuttuni pissaaq.


Allagartartaartut