Nuummiup tunniusimasup silassorissullu qimappaatigut

Hans Pavia Egede pillugu eqqaaniut – Kommuneqarfik Sermersuumi borgmester Asii Chemnitz Narupimit.

Hans Pavia Egedep alianartumik toqusimanera oqimaatsumik tusarpara. 63-iinnarnik ukioqarluni siuseqisumik qimappaatigut.

Hans Pavia Egede Nuummiuusimavoq isumassarsiarpassualik iliuuseqallaqqissorlu, annertuunik eqqarsaatersuuteqarnissamut qununngitsoq. Inuuneranut illoqarfitta pingaarnersaat qitiusimavoq. Nuummi inunngorsimavoq, Nuummi alliartorsimavoq Nuummilu malunnaatilimmik sunneeqataasimalluni. Nuup Kommuunerisimasaani kommunalbestyrelsemi ilaasortatut, illoqarfiup ineriartorneranut annertuumik sunneeqataasimavoq, eqeersimaartutut siuariartorfiusutullu Nuuk pingaarnertut illoqarfinngorneranut suleqataasimalluni.

Inuk ilakkuminartoq qanilliuminaattorlu
Hans Pavia Egede – amerlasuunit Tattamik taaneqartartoq – 1954-imi inuusimavoq. Inuusimavoq inunnut akulerusimasuunissaminut nuannarisalik. Illuatungaanilli aamma inuusimavoq qanilliuminaatsoq, imminut eqqartorusunneq ajortoq, inunnilli inuunermi naapitaminik tusaaniarumanerusoq.

Qatanngutigiippassuit akornanni alliartorsimavoq, nukarlersaallunilu angajoqqaaminit assut asaneqarsimavoq, inuttut tukkusutut malussarissutullu kinaassuteqarfigilersimasaminik. Red Barnetip meeqqerivianiissimavoq kingornalu Qorsussuarmi atualersimalluni.

Suli inuusutsilluni suliffeqarfilerineq niuernerlu soqutigisarilersimavai. Taamaammallu Ikast Handelsskolemut ilinniariarsimalluni. Tassani pisiniarfilerineq ingerlavigissallugu toqqarsimavaa, Nuummullu utersimalernermini ukiuni tulliuttuni kukkunersiusitut tunuliaqutaqarnermigut, suliniutit isumassarsiallu piviusunngortittarsimavai – ingammik niuernerup aalisarnerullu silarsuaani.

Niuertarfiutilik sunniuteqarluartoq
Nuummi sunniuteqarluartuusimanera niuertuusimaneralu eqqaallugu qungujunngitsoorsinnaanngilanga. Erik Heilmann peqatigalugu Nuummi pisiniarfik Kamik aallartissimavaa. Kingusinnerusukkut kilisaatilinnut ilanngussimavoq, 1984-milu Anders Brøns peqatigalugu aalisariutaatileqatigiiffik Polar Seafood aallartippaa. Suliffeqarfillu taanna kingusinnerusukkut qimappaa. Suliffeqarfiup aallartinneratigut Kalaallit Nunaata oqaluttuarisaanerani suliffeqarfiit malunnaateqarnerpaat pilersitseqataaffigaa.

Hans Pavia Egede inuttut paasisaqarumatuutut, suleriallaqqissutut, tunniusimasutut inuiaqatigiilerinermillu soqutigisalittut aallarnisaasutu politikeritullu niuertutullu eqeersimaartutut eqqaamarusuppara. Ullumi tamatta Nuummiuusugut annertuumik qutsavissaqarfigaarput. Salliullunumi takutippaa, illoqarfigisamut nunagisamullu tunniusimalluni sulinikkut suna tamarmi anguneqarsinnaasoq. Nuummi ineriartorneq siuarsaaqataaffigaa, Kalaallillu Nunaata aningaasaqarnikkut ineriartortinneqarnera peqataaffigaa, aallarnisaasutut isumassarsiortutullu.

Annertuunik eqqarsaasersornissaminut qununngitsoq
Tassami Hans Pavia Egede angisuunik eqqarsaasersioriallaqqissuusimavoq. Politikkikkummi inuussutissarsiornermilu unammilligassat taamatoqqissaaq naapinniartarsimavai. Soqutigisaasami assigiinngiiaarnerisigut tamalaanillu aallutaqarnermigut arlalinnik kalluaasunik suliaqarsimavoq,tamatumuunalu inuussutissarsiorneq, politikki timersornerlu pillugit arlaatigut isummerfeqartuarsimalluni. Soqutigisaqarfiit pingasut inuunerani annertuumik initusimasut.

Nuuk Kommuniani kommunalbestyrelsemi annertuumik tunniusimasumillu sulisimavoq. Siusinaarluni kommunalbestyrelsemut ilaasortanngorsimavoq, Aningaasaqarnermut Ataatsimiititami Teknikkimullu Ataatsimiititami ilaasortaanermigut Nuuk malunnaatilimmik sunneeqataaffigisimallugu. Nuup illoqarfittut ineriartornera aallarnisaaqataaffigisimavaa, Nuullu nutaamik Qinngutsinni ilaneqarneranut annertuumik pisooqataasimalluni.

Eqqarsaatit annertuut annikitsorsiorlunilu sulineq tamaasa sapinngilai, sukumiisumillu pilersaarusiullaqqissutsimigut kommunimi suliniutini qulaajagassat tamaasa qulaarneqarnissaat pikkoriffigisimavaa.

Hans Pavia Egedep aningaasaqarnerup tungaatigut pikkoriffeqarnera niuernermilu silasiullaqqissuunera Nuup Kommuniani Aningaasaqarnermut Ataatsimiititap iluaqutigisimavaa. Ataatsimiititaq illoqarfiit pingaarnersaanni inuussutissarsiornermi sinaakkutinik pitsaasunik iluanaarfiusunillu pilersitsisimavoq.

Inuk pissanganartoq
Pikkorissutut politikkeriunermi niuertuunermilu saniatigut Hans Pavia Egede inuusimavoq pissanganartoq, arlalitsigut illoqarfimmut asasaminut sunniuteqarsimasoq. Nuummiuittut illoqarfimmut inuiaqatigiinnullu tunniusimalluni sulisimavoq.

KNR-mi Kalaallillu Nunaanni Timersoqatigiit Kattuffianni siulersuisuni ilaasortaasimavoq, ukiorpaalunnilu timersoqatigiiffimmi siuttunut pingaarutilimmik inissisimasimalluni.  Kilaasaataatiliunermi nalaani illoqarfiit pingaarnersaanni timersornikkut aaqqissuussani aningaasaliisukkajussimavoq.

Ilaatigut ataqqinaammik Sverigemit konsuliusimavoq – suliaq nakimaalluni atorsimasaa. Qanigisami avatangiisimilu akornanni nuannaarnermik siammarterinissamut qanilaartuusimalluni. Erinarsoqatigiittoqartillugu tunuarsimaartuusimanngilaq, apeqqutaasimanngilarlu erinaq uniulaarlugu erinarsoqataagaluaruni. Hans Pavia Egede ilagalu nuannertuarsimavoq.

Politikeri alapernaatsoq
Hans Pavia Egede inuunini naallugu alapernaatsuusimavoq, tamannalu partiinut ilaasortaaffigisarsimasaatigut takusinaavarput. Politikkikkut sulinera Atassummi aallartissimavoq, kingorna Akulliit Partiianni ilaatigut sinnerlugu 1991-miit 1995-mut Inatsisartunut ilaasortaaffigisimasani, naggataagut Nuup Kommuniani kommunalbestyrelsemi ilaasortaanini Inuit Ataqatigiinni ilaasortatut naggaserlugu. Politikeriusimasoq, inuunini naallugu paasisaqarumatooq ukiullu ingerlanerini politikkikkut isummami allanngorarsinnaanerisa nassuerutiginissaanut qununngitsoq matumani takusinnaasoraara. Killilersuinermik akerliusutut aallarnerfeqarsimalluni, inoqatinik aallaaveqarluni sulineq Hans Paviami annertusiartortumik inissaqaleriartorsimavoq.

Hans Pavia Egede kommunalbestyrelsemi ilaasortaasareerluni, ukiut ulapaarfigisani kingullit IA-p Inatsisartuni gruppiani allaffimmi pisortatut suliffigisimavai. Misilittakkani annertuut inuunermilu sivisuumi, niuertarfiutilittut, aningaasaqarnermik sammisalittut politikeritut ilisimasaqarluartutut, Hans Pavia Egede IA-mut qasujaatsutut naliitsutullu ikiuutaasimavoq.

Hans Pavia Egedep inuunermini ukiut kingullit Danmarkimi Ebeltoftimi atorpai.

Ataqqinnigaarlunga, eqqarsaatikka misiginneqataaneralu Hans Pavia Egedep ilaqutaanilu ikinngutaaniitippakka.

Hans Pavia Egedep eqqaaneqarnera ataqqinartuuli, Asii Chemnitz Narup