Illit oqarasuaatit atorlugu oqartussaaqataagit

Tamat oqartussaaqataanerannut innuttaasut inuusuttullu qanimut peqataatinniarlugit Kommuneqarfik Sermersooq demograti-app-imik suliaqarpoq.

Kommuneqarfik Sermersuumi tamat oqartussaaqataanerannut peqataanissaq ajornannginnerulersinniarlugu app-imik pilersitsisoqarpoq, tamatumani innuttaasut tusarneqarnissaminnut periarfissinneqassallutik.

App nutaaq taaguutilik Isumaga, atorlugu innuttaasut sammisanut qinikkanit kommunimiillu pingaartinneqartunut assigiinngitsunut taasitinneqartalissapput. Tassani siunertarineqarpoq innuttaasut qaninnerulerniarlugit qinikkanullu sunik kissaateqarnerat paasisaqarfiginerunissaat anguniarlugu sakkussaqalernissaq.

Isumaga immikkut ittumik ineriartortitaavoq, inuusuttut sumiiffiinut naapinniarlugit, tamallu oqartussaaqataanerannut peqataatinnerulerumallugit.

“Inuusuttut amerlanerusutut tamat oqartussaaqataanerannut peqataanerulernissaat kissaatigeqaarput, taamaattumik sunik kissaateqarnersut aperinikuuavut, akissutaallu tassaavoq app-imik pilersitsisoqassasoq,” borgmester Asii Chemnitz Narup oqarpoq.

Isumaga pilersinnissaanut toqqammaviuvoq, Kommuneqarfik Sermersuumi inoqarfinni allanisut Nuummi Najukkami Ataatsimiititaliortoqarnissaanik soqutiginnittoqannginnera. Kisianni Nuummi piffissamik atuiffiuallaanngitsumik peqataatinneqartarnissaq kissaatigineqarpoq, tamatumanilu app-imik pilersitsinissaq akissutigineqarpoq, tamannalu maannakkut kommune tamakkerlugu atuutilissaaq.

Isumaga ima atorneqartarpoq, nammineq oqarasuaammut aaneqartarluni, taavalu taasissutaasussat ataavartumik tassunga ikineqartassallutik. Taava taanna atorlugu innuttaasut ataasiakkaat soqutigisatik naapertorlugit peqataajumanerminnik nalunaaruteqartassapput.

Pissanganarnerulersinniarlugu piffissap ingerlanerani pointinik sipaartoqartassaaq, taamaasillunilu peqataasut imminnut unammisinneqartassallutik. Peqataasut apeqqutinik amerlanerusunik akissuteqarsimasunut pinnatassiisoqartarnissaanut ataavartumik  makitsisoqartassaaq.

Aamma pingaaruteqarpoq paasissutissat illugiinnut ingerlasarnissaat, aammalu app-i ataavartumik nutartikkanik nassiussisassaaq, taamaasillutik taasinernut peqataasut qanoq taasinerit ingerlanerinik paasisaqartarniassammata.

“Inuusuttut peqataatinneqarnissaat pingaaruteqartorujussuuvoq. Taakkua oqariartuutaat tamatigut tusaaneqarneq ajorput, kisiannili tusarfiginissaat pingaarteqaarput. Taamaattumik nuannaarutigeqaarput, Isumaga atorlugu inuusuttunik taakku sumiiffiini naapitsisinnaagatta,”  borgmester Asii Chemnitz Narup oqarpoq.

App’i Nuummi suliffeqarfiit ilaanni Let It Snow ApS JJ Lennert-Sandgreen-imit ineriartortinneqarpoq, taassumalu  Isumaga ineriartortitarivaa, taamaasilluni kommune tamakkerlugu atorneqarsinnaasunngorlugu:

Taanna taamaallaat 4 mb-ivoq, ataavartumillu paasissutissarpassuarnik pisariaqartitsiffiunani. Tamakkua tamarmik kommune tamakkerlugu atorneqarsinnaaneranut periarfissiipput.